ADNSU məzunları universitetdə rəhbər vəzifələrə təyin olunublar

Azərbaycan Dövlət Neft və Sənaye Universitetinin (ADNSU) dörd uğurlu məzunu ADNSU-nun nəzdində fəaliyyət göstərən SABAH Mərkəzində proqram rəhbəri vəzifələrinə qəbul olunub.

"Azərbaycan müəllimi" xəbər verir ki, yeni təyinatlar üzrə rəhbər vəzifələrə seçilən namizədlər aşağıdakılardır:

Mahmud İsmayılov — Elektrik-elektronika və sənaye mühəndisliyi üzrə proqram rəhbəri
Mexanika mühəndisliyi üzrə fərqlənmə ilə bakalavr və magistr təhsilini ADNSU-da tamamlamış, hazırda fəlsəfə doktoranturasında təhsilini davam etdirən M. İsmayılov universitetdə müəllim kimi fəaliyyət göstərir. O, eyni zamanda ASOIU & Warwick ikili diplom proqramlarında dərs deyir və beynəlxalq qrant layihələrinin rəhbəridir. Beynəlxalq müsabiqələrin qalibi olan İsmayılov həm elmi, həm də innovativ fəaliyyəti ilə seçilir.

Samir Əliyev — Data analitikası, informasiya texnologiyaları və kompüter elmləri üzrə proqram rəhbəri
ADNSU-da kompüter elmləri ixtisası üzrə bakalavr təhsili alan, magistraturanı Macarıstanın Eötvös Loránd Universitetində başa vuran Samir Əliyev hazırda ADNSU-da mühəndis-proqramçı və müəllim kimi çalışır. O, süni intellekt, federativ öyrənmə və data analitikası üzrə çoxsaylı beynəlxalq və yerli elmi məqalələrin müəllifidir.

Elnur Əlizadə — Neft-qaz və kimya mühəndisliyi üzrə proqram rəhbəri
Neft-qaz mühəndisliyi üzrə bakalavr təhsilini ADNSU-da, magistraturanı isə Çin Neft Universitetində (Pekin) başa vuran E. Əlizadə hazırda ADNSU-da fəlsəfə doktorantıdır. O, Q1 və Q2 indeksli jurnallarda dərc olunmuş elmi məqalələrin, eləcə də Azərbaycan Respublikasında qeydiyyatdan keçmiş patentin müəllifidir. Eyni zamanda beynəlxalq elmi layihələrin rəhbəri kimi fəaliyyət göstərir.

Rəşad Abbasov — Neft-qaz geologiyası üzrə proqram rəhbəri
ADNSU məzunu, Dövlət Proqramı qalibi Rəşad Abbasov 25 sentyabr 2025-ci il tarixində Fransanın Strasburq Universitetində Geofizika üzrə doktorluq dissertasiyasını uğurla müdafiə edərək PhD dərəcəsi alıb. Magistraturanı UFAZ-da, bakalavr təhsilini isə Azərbaycan Dövlət Neft və Sənaye Universitetində fərqlənmə ilə bitirib. O, Strasburq Universitetində “Yağışın təsiri ilə baş verən torpaq sürüşmələrinin hidro-mexaniki modelləşdirilməsi: qeyri-müəyyənliklərin, model sadələşdirmələrinin və səthi gərginliyin təsirinin qiymətləndirilməsi” mövzusunda doktorluq dissertasiyasını uğurla müdafiə edərək Geofizika sahəsində PhD dərəcəsi alıb.