Təhsildə keyfiyyət birgə yaradılır - Xarici mütəxəssis Flandriya təcrübəsindən danışdı

“Təhsildə keyfiyyət mədəniyyəti təsadüfən formalaşmır, o, birgə yaradılır”.

“Azərbaycan müəllimi” xəbər verir ki, bu fikirləri Məktəb İnspektorluqlarının Daimi Konfransının (SİCİ) İnkişaf üzrə rəhbəri, Avropa məktəb inspektoru Erik De Bou bu gün keçirilən “Ümumi təhsildə keyfiyyətin yüksəldilməsi: Təcrübələr və yeni yanaşmalar” adlı elmi-praktik beynəlxalq konfransda məruzə ilə çıxış edərkən səsləndirib.

Çıxışında Flandriyada tətbiq olunan Məktəb Müfəttişliyi 2.0 modelinin əsas elementlərini təqdim edən De Bou bildirib ki, tətbiq edilən bu sistemin məqsədi məktəbləri nəzarət altında saxlamaq deyil, məktəblərarası dialoqu gücləndirmək və vahid keyfiyyət mədəniyyəti formalaşdırmaqdır.

O əlavə edib ki, Flandriyada monitorinq mexanizmi dörd əsas qurumun kəsişməsində fəaliyyət göstərirlər:

 1. Qanunvericilik və sistem səviyyəsi,
 2. Təhsil üzrə məsləhətverici siyasətlər (advisory policies); 
 3. Müfəttişlik orqanlarının özləri,
 4. Fərqli məktəb idarəediciləri — dövlət (public) məktəbləri, vilayət (provincial) məktəbləri, icma (community) məktəbləri və azad (free) (məsələn, katolik) məktəblər.

De Bou həmçinin məktəblərdə keyfiyyətin təmin olunması və qiymətləndirilməsi üçün hazırlanmış çərçivədən danışıb. Onun sözlərinə görə, bu çərçivənin mərkəzində şagirdin inkişafı dayanır. Şagirdin inkişafını isə tədris prosesi, təhsil məqsədləri, monitorinq və yönləndirmə (guidance), məktəbin inkişaf keyfiyyəti, həmçinin maliyyə və maddi resursların idarə olunması əhatə edir.