Burada səhvlər olduğu kimi çap olunur – “Məktəbli”nin fərqli yanaşması

Əziz məktəblilər, təsəvvür edin ki, oxuduğunuz dərslərlə yanaşı, yazdığınız hekayələr, çəkdiyiniz şəkillər, hətta qurduğunuz xəyallar belə bir gün qəzet səhifələrində öz yerini tapır. Adınızı çap olunan yazının altında görmək, imzanızın oxuculara yol tapması isə olduqca gözəl hissdir. Bəli, bunun üçün belə bir qəzet var - “Məktəbli" qəzeti. Bu qəzet məktəblilərin səsi, yaradıcılıq dünyalarına açılan qapıdır. Burada hər bir məktəbli öz sözünü deyə, istedadını nümayiş etdirə, xəyallarını gerçəyə çevirə bilər.

Gəlin “Azərbaycan müəllimi” olaraq yaradıcılığın ünvanı olan bu qəzeti birlikdə tanıyaq.

Elə tanış olmaq üçün də, üz tuturuq qəzetin nəşr olunduğu məkana. Seçdiyimiz tarix də təsadüfi deyil. Həmin gün biz qəzetin balaca əməkdaşları ilə də tanış olmaq şansı da əldə edirik. Çünki ənənəvi olaraq növbəti dəfə də “Əfsanəvi hekayələr” və rəsm müsabiqəsinin qalibləri mükafatlandırılırdı.

“Məktəbli” qəzeti bu ilin fevral ayından etibarən məktəblilər üçün iki yaradıcılıq müsabiqəsinə start verib. Qaliblər isə oxucuların bəyənmə sayına əsasən seçilib. Bir azdan müsabiqənin qalibləri ilə tanış olacağıq, amma, ilk növbədə, qəzetin yaranma tarixinə nəzər salaq.

"Məktəbli" qəzeti ilk dəfə 2023-cü ilin 15 sentyabrında yeni tədris ilinin başlanması münasibətilə Naxçıvanda dərc olunaraq məktəblilərə təqdim edilib. Qəzetin yaranmasının əsas məqsədi uşaqlar üçün maraqlı və faydalı məlumatların çatdırılması, eyni zamanda onların yazı və nitq bacarıqlarını inkişaf etdirməkdir.

Qəzetin təsisçisi Pərvin Məmmədov, baş redaktoru isə Fariz Əhmədovdur. Ümumilikdə heyət 5 nəfərdən ibarət olsa da, əslində, burada şagirdlərdən ibarət komanda var. Qəzet materiallarının 60%-ə qədəri uşaqlar tərəfindən hazırlanır, redaksiya isə onlara müəyyən qədər kömək edir. Gələcəkdə qəzetin hazırlanmasının daha çox hissəsinin məktəblilərin özləri tərəfindən edilməsi planlaşdırılır.

Məktəblilər qəzetlə əməkdaşlıq edərək məqalə, hekayə yazır, şəkil çəkir, krosvord hazırlayıb göndərirlər. Elə "Məktəbli" qəzetinin yaradılması ideyasının kökündə də uşaqların təhsil və inkişafına dəstək olmaq dayanır.

Fariz Əhmədov deyir ki, qəzet təkcə Naxçıvan üçün yox, ümumilikdə ölkə üçün nəzərdə tutulub: “Azərbaycanın bütün məktəblərinə və idarələrə ilk nüsxəsi pulsuz göndərilib. Bu çox diqqət və marağa səbəb olub. “Məktəbli" qəzeti hər ay 12 səhifəlik bir buraxılışla çıxır.  Əsas yenilik odur ki, məktəblilər öz yazılarını əlyazma formasında göndərir və həmin yazılar səhvləri ilə birlikdə olduğu kimi qəzetdə çap olunur. Bu ideya isə uşaqların yazı səhvlərini azaldır, gözəl və səliqəli xətlə yazmalarına təşviq edir. Bundan əlavə, qəzetdə uşaqların öz çəkdikləri şəkillər və fotoşəkillərin yer aldığı "Rəsm qalereyası" və "Fotostudiya" səhifələri də var ki, burada məktəblilər öz yaradıcılıqlarını sərbəst ifadə edə bilirlər”.

Qəzetdə həmçinin hekayələr və kitab bölümü var. Hər ay yeni nüsxədə kitab tövsiyə edilir. Tərəfdaşları isə “Parlaq imzalar” və “Qanun” nəşriyyatlarıdır ki,  kitab təminatını bu nəşriyyatlar ödəyir.

Baş redaktor deyir ki, qəzet “Azərpoçt” və “Naxçıvanpoçt” vasitəsilə bütün bölgələrə satışa gedir: “Abunə haqqı aylıq 2 manat, ildə 10 dəfə nəşr olunduğu üçün, illik isə 20 manatdır. Hər ay 1500 tirajla satışa gedir. Bu ay 2 min tirajı keçmişik, məqsədimiz 20 minə çatmaqdır. Yaxşı bir nümunə deyim ki, Ordubad rayonunun Ələhli kənd tam orta məktəbində bütün müəllimlər qəzetə abunə yazılıblar. Hər ay isə 10 ədəd əlavə qəzet istəyirlər”.

Qəzetdə fəal müxbirlər seçilir və onlara tədris ili müddətində jurnalist vəsiqələri təqdim edilir. Ona görə də demək olar ki, əslində burada gələcəyin jurnalistləri də yetişdirilir. Müxtəlif bölümlərdə şagirdlərin uğurları, kəşflərin tarixi, idmançılar barədə məlumatlar da verilir. Qəzetin həmçinin öz saytı və sosial şəbəkə hesabları var ki, burada uşaqların göndərdiyi materiallar dərc olunur.
Baş redaktorla söhbətimizi bitirib qalib gələn və qəzetlə əməkdaşlıq edən şagirdləri tanımağa başlayırıq. Qeyd etdiyimiz kimi, Azərbaycanın bütün bölgələrinə gedib çıxan qəzetin müsabiqəsində müxtəlif bölgələrdən olan qaliblər də var. Misal üçün, Sumqayıt şəhər 35 nömrəli məktəbin şagirdi Ötkəm Bayramgil hekayə müsabiqəsində birinci, Şabran şəhər 4 nömrəli tam orta məktəbin şagirdi Şükriyyə Qurbanova isə rəsm müsabiqəsində ikinci yerin qalibi olub.  

“Əfsanəvi hekayələr” müsabiqəsində ikinci yerin qalibi Mahir Oruclu ilə söhbətləşirik. O, Naxçıvan şəhər 6 nömrəli tam orta məktəbin 5-ci sinif şagirdidir və gələcəkdə yazar olmaq istəyir. Deyir ki, 3-cü sinifdən etibarən qəzetə yazılar göndərir, əməkdaşlıq edir: “Məni bura məktəbdə müəllimim yönləndirib. Sinif yoldaşım şəkil, mən isə tez-tez yazı göndərirəm”.

Bu dəfə onun "Uğurun sirri" adlı hekayəsi müsabiqədə qalib olub. Hekayə uşaqlara tövsiyə xarakterli yazılıb. Gənc yazarın əlavə hekayələri də var, o yaxınlarda kitab çıxarmaq istəyir.

Rəsm müsabiqəsində birinci yeri Naxçıvan şəhər 11 nömrəli tam orta məktəbin şagirdi Samir Babazadə tutub. O, müsabiqəyə birinci dəfədir qatılır: “Xarı bülbül” adlı şəkillə qalib olmuşam. Rəsm çəkməyi, riyaziyyat, informatika fənlərini sevirəm. Gələcəkdə həm də peşəkar rəssam olmaq istəyirəm”.

Naxçıvan şəhər 17 nömrəli tam orta məktəbin şagirdləri və bacı-qardaş olan Təranə və Mirhüseyn Seyidli də qaliblər sırasındadırlar.

Təranə Seyidli 6-cı sinifdə oxuyur, deyir ki, əvvəllər də yazılar təqdim edib, amma ilk dəfədir ki, hekayə üzrə qalib olub: “Qalib olduğumu eşidəndə çox sevindim. Dovşan və tülkü haqqında hekayə təqdim etmişəm. Qardaşım onun şəklini çəkmişdi, mən də dedim ki, hekayəsini yazacağam”.

4-cü sinif şagirdi Hüseyn Seyidli isə müsabiqəyə “Ağac və quş” adlı şəkillə qatılıb. O da bacısı kimi indiyə qədər müxtəlif rəsmlər versə də, bu dəfə qalib olub: “Qəzetlə həvəskar rəssam kimi əməkdaşlıq edirəm. Rəsmə marağım 5 yaşımdan başlayıb. Gələcəkdə də sərgi keçirmək və bu sahə üzrə təhsil almaq istəyirəm”.

Qeyd edək ki, bütün qaliblər qəzetin redaksiya heyəti tərəfindən sertifikat, qələm, gündəlik, həmçinin nağıl kitabları və digər hədiyyələrlə mükafatlandırılıb. Bölgələrdə olan qaliblərin hədiyyələri isə karqo yolu ilə göndərilib. Qəzetin səhifələrini həm də fotoşəkillər bəzəyir. Biz də, bu şəkillərin müəllifi ilə tanış oluruq. 14 yaşlı fotomüxbir Kənan Kamilli deyir ki, foto çəkməyə uşaqlıqdan böyük həvəsi olub: “Atamın mənə hədiyyə etdiyi fotoaparat bu həvəsimi daha da artırdı. İlk çəkdiyim foto loqolarımdakı insan personajlarının şəkili idi. Hər ay Naxçıvan şəhərində olan maraqlı kadrları “Məktəbli” qəzetinə göndərmək mənim üçün çox maraqlıdır. Foto çəkərkən həyəcanlanmıram, çünki həyəcan olarsa, o şəkil tam istədiyiniz kimi olmur. Mənim üçün ən gözəl şəkil təbiət və abidələrin şəkilləridir”.

Bəs foto çəkərkən əsasən nəyə diqqət edir? Fotolarının gözəl alınmağının sirrini açıqlayır: “Foto çəkərkən ən əsas arxa fona diqqət edirəm, əgər arxa fon yaxşı deyilsə, şəkil də yaxşı alınmır. Şagirdlərin öz bacarıqlarını nümayiş etdirmələri çox gözəldir. Fotoqraf olmaq mənə ətrafımdakı gözəllikləri digər insanlara çatdırmağı öyrədib. Gələcəkdə fotoqrafçılıqla ikinci sənət olaraq məşğul olacam. Foto çəkməyi sevən dostlarıma onu demək istəyirəm ki, həmişə ətraflarına baxsınlar, bütün gözəllikləri görsünlər və bu gözəllikləri insanlarla paylaşsınlar”.

Beləliklə, "Məktəbli" qəzeti artıq Naxçıvan Muxtar Respublikasından başlayaraq Azərbaycanın bütün bölgələrində tanınıb və uşaqların media sahəsində aktiv iştirakını təmin edir, onların istedadlarını ortaya çıxarır, sosiallaşdırır. Ən əsası artıq məktəblilərin də oxuya biləcəyi qəzet var.

Qəzetin “Məktəblilərin istedadını üzə çıxarmağa davam edirik” şüarı ilə ümidvarıq ki, “Məktəbli” qəzeti şagirdlərin yaradıcılıq potensialını inkişaf etdirəcək, təhsil prosesini daha müasir formada ictimaiyyətə çatdıracaq.