"Novruz 2025" düşərgəsi təşkil edilib

"Novruz 2025" düşərgəsi təşkil edilib

Azərbaycan Təhsil İşçiləri Azad Həmkarlar İttifaqı (ATİAHİ) Respublika Komitəsi tərəfindən növbəti bayram düşərgəsi təşkil edilib. Müqəddəs Ramazan ayına təsadüf edən Novruz bayramı münasibətilə təşkil edilən düşərgədə ittifaq üzvlərinin istirahəti təmin olunacaq.

“Azərbaycan müəllimi” xəbər verir ki, Xaçmaz rayonunun Xuray kəndində yerləşən “Təhsil” İstirahət Mərkəzində təşkil olunan düşərgədə 2 mərhələ üzrə 350-yə yaxın təhsil işçisi, həmçinin 300-dən artıq ali məktəb tələbəsi  olmaqla ümumilikdə 650 ittifaq üzvünün istirahət etməsi nəzərdə tutulur. 

Artıq düşərgə 21-25 mart tarixlərini əhatə edəcək birinci mərhələ üzrə  məktəbəqədər təhsil müəssisələrində çalışan təhsil işçilərinin istirahətini reallaşdırıb. 

Düşərgənin açılış mərasimində Azərbaycan Təhsil İşçiləri Azad Həmkarlar İttifaqı Respublika Komitəsi sədrinin birinci müavini Tehranağa Abdullayev çıxış üçün söz alaraq ATİAHİ Respublika Komitəsinin sədri Araz Paşayevin Novruz bayramı münasibətilə təhsil işçilərinə təbriklərini çatdırıb. T.Abdullayev düşərgədə iştirak edən respublikanın müxtəlif bölgələrindən olan məktəbəqədər təhsil müəssisələrində çalışan ittifaq üzvlərinə xoş istirahət və gələcək fəaliyyətlərində uğurlar arzulayıb.

Qeyd olunub ki, 5 gün müddətində “Novruz 2025” düşərgəsi məktəbəqədər təhsil müəssisələrində çalışanların vaxtlarını 
səmərəli keçirmək, şən və mənalı istirahətini təşkil etməklə yanaşı, onların övladları üçün rəngarəng əyləncə proqramı kimi imkanlar təqdim edir. 

Proqram çərçivəsində məktəbəqədər təhsil müəssisələrində çalışan təhsil işçilərinin iştirakı ilə mədəniyyət və incəsənət tədbirləri, əyləncəli şou proqramlar təşkil olunacaq, komanda quruculuğuna dair fəaliyyət istiqamətində əməkdaşlıq və ünsiyyət bacarıqları müzakirə ediləcək. Həmçinin düşərgə iştirakçıları üçün psixoloji dəstək seminarları keçiriləcək.

Düşərgənin ikinci mərhələsi isə 26-31 mart olmaqla ölkənin müxtəlif ali təhsil müəssisələrinin ittifaq fəalları olan tələbələrini əhatə edəcək. 

Ümumilikdə 10 gün davam edəcək düşərgə çərçivəsində bayram proqramları ilə yanaşı, iştirakçıların bilik və bacarıqlarının inkişafına yönəlmiş intellektual oyunların və maarifləndirici tədbirlərin təşkili nəzərdə tutulub.

“Novruz 2025” bütövlükdə iştirakçıların sosial inkişafını dəstəkləməklə yanaşı, onların komanda işi və yaradıcılıq bacarıqlarının artırılmasına şərait yaradacaq.

Düşərgənin ikinci mərhələsində tələbələr üçün komanda ruhunun və fiziki aktivliyinin artırılması üçün müxtəlif idman yarışları, onların analitik düşüncə və məntiqi təhlil qabiliyyətlərinin inkişaf etdirilməsinə xidmət edən intellektual oyunlar, mədəniyyət və incəsənət tədbirləri, eyni zamanda, iştirakçıların natiqlik qabiliyyələrinin peşəkar inkişafı, liderlik, şəxsi bacarıqların təkmilləşdirilməsi istiqamətində təlimlər təşkil olunacaq.Gənclərin istirahətlə yanaşı,
intellektual bacarıqlarının təqdimatı üçün geniş imkanlar yaradılacaq. 

Ümumiyyətlə, “Novruz 2025” düşərgəsi çərçivəsində nəzərdə tutulan bütün tədbirlər gənclərin təfəkkürünün, sosial və akademik inkişafını dəstəkləməyi, o cümlədən onların liderlik, komanda işi və yaradıcılıq bacarıqlarını artırmağı hədəfləyir. Burada tələbələr üçün komanda ruhunun və fiziki aktivliyinin artırılması üçün müxtəlif idman yarışları, onların analitik düşüncə və məntiqi təhlil qabiliyyətlərinin inkişaf etdirilməsinə xidmət edən intellektual oyunlar, mədəniyyət və incəsənət tədbirləri, eyni zamanda, iştirakçıların natiqlik qabiliyyələrinin peşəkar inkişafı, liderlik, şəxsi bacarıqların təkmilləşdirilməsi istiqamətində təlimlərin təşkili nəzərdə tutulur.

Bir sözlə, “Novruz-2025” düşərgəsi gənclərə həm də yeni dostluqlar qurmaq, fərqli təcrübələr qazanmaq və özünü inkişaf etdirmək üçün unikal bir platformaya rolunu oynayacaq.