Ekoloji problemlərin həllinə töhfə - Şəki məktəblilərinin uğuru

Ekoloji problemlərin həllinə töhfə - Şəki məktəblilərinin uğuru

Şəki şəhər 6 və 18 nömrəli tam orta məktəblərin şagirdləri "Sabahın alimləri" müsabiqəsində III yerə layiq görülüblər.

"Sellüloza üçün yeni həyat" layihəsi ilə uğur qazanan şagirdlər “Azərbaycan müəllimi”nə bildiriblər ki, “Sabahın alimləri” müsabiqəsində qazandıqları uğur onların ekoloji problemlərin həllinə töhfə vermək arzularını daha da gücləndirib.    

Şəki-Zaqatala Regional Təhsil İdarəsinin iki fərqli məktəbində təhsil alan gənclərin bir araya gələrək hazırladıqları layihə müsabiqənin münsiflər heyətinin xüsusi marağına səbəb olub.

Gənc tədqiqatçılar bildirirlər ki, ölkəmizdə çox zaman tullantı kimi qəbul edilən ağac yonqarını daha səmərəli şəkildə istifadə etməyin mümkünlüyünü sübut etməyə çalışıblar. Onların araşdırmasına görə, yonqar yalnız yanacaq kimi deyil, eyni zamanda qab-əşya istehsalı və malçlama prosesində də faydalı ola bilər. Layihədə bu proseslərin həm iqtisadi, həm də ekoloji üstünlükləri nümayiş etdirilib.

Sadiq Allahverdiyev Şəki şəhəri 18 nömrəli tam orta məktəbin 11-ci sinif şagirdidir. Bundan əvvəl qatıldığı “Nə? Harada? Nə zaman?” intellektual yarışında komandası ilə birlikdə II yeri qazanıb. Sadiq deyir ki, ekoloji problemlərin həlli üçün elmi yanaşma son dərəcə vacibdir və gələcəkdə də bu sahədə innovativ layihələrə imza atmağı planlaşdırır. Sadiq yaxın gələcəkdə Almaniyada aqronomluq üzrə ixtisaslaşmağı arzu edir. O bildirir ki, kənd təsərrüfatı sektorunda ekoloji problemlərin effektiv həllinə xüsusi diqqət yetirmək ölkəmiz və dünya üçün vacibdir.

Sədaqət Yusifova Şəki şəhər 6 nömrəli tam orta məktəbin 10-cu sinif şagirdidir. O, 4-cü qrup üzrə ali məktəbə hazırlaşır və gələcəkdə neyrocərrah olmaq istəyir. Hələ tətbiqi reallaşmamış beyin transplantasiyasını praktiki müstəviyə daşımağı qarşısına məqsəd qoyan Sədaqət ali təhsilini Azərbaycan Tibb Universitetində başa vurduqdan sonra Almaniyada rezidentura təhsili almağı planlaşdırır.

Müəllimlərin rolu və birgə əməkdaşlıq

Məktəblər fərqli olsa da, yarış üçün bir araya gələn gəncləri bu uğura yönəldən elmi rəhbərləri gənc müəllim Samirə Allahverdiyevadır. Layihənin elmi rəhbəri  şagirdlərə həm elmi-metodiki, həm də mənəvi dəstək verib. Samirə müəllimin  sözlərinə görə, bu cür əməkdaşlıq bölgələr üzrə şagirdlərin potensialını daha da artırır və yeni ideyaların formalaşmasına şərait yaradır.