Məktəblərin uğurları birbaşa direktorun liderliyindən asılıdır - Tədqiqat 

“Məktəb liderliyi təhsil keyfiyyətinin yüksəldilməsində həlledici rol oynayır. Məsələn, UNESCO-nun “Global Education Monitoring Report 2024–2025” hesabatı göstərir ki, güclü liderlik resursların səmərəli bölgüsünə, müəllimlərin peşəkarlıq səviyyəsinə və onların praktikasına müsbət təsir edir. Eyni zamanda, şagird nailiyyətlərini xüsusilə sosial-iqtisadi cəhətdən əlverişsiz ərazidə yerləşən məktəblərdə əhəmiyyətli dərəcədə yaxşılaşdırır”.

“Azərbaycan müəllimi” xəbər verir ki, bu fikirləri Məktəb inspeksiyasında akademik rəhbər Aysel Əzimova bu gün keçirilən “Ümumi təhsildə keyfiyyətin yüksəldilməsi: Təcrübələr və yeni yanaşmalar” adlı elmi-praktik beynəlxalq konfransda məruzə ilə çıxış edərkən səsləndirib.

O bildirib ki, daha bir tədqiqat “Beynəlxalq uğurlu məktəb liderliyi” layihəsi 2001-ci ildən 20-dən çox ölkədə məktəb liderliyini araşdırır. Bu layihənin 2024-cü il nəticələrinə görə, məktəblərdə əldə olunan demək olar ki, bütün əhəmiyyətli uğurlar birbaşa məktəb direktorunun liderliyindən asılıdır.

Başqa bir tədqiqat isə 65 ölkədə 15 000 məktəbi əhatə edib. Bu beynəlxalq araşdırmanın nəticələri göstərir ki, effektiv məktəb liderliyi ilə şagirdlərin öyrənmə nəticələri arasında güclü və müsbət əlaqə mövcuddur:

“Araşdırmalar arasında ən çox sitat gətirilən nəticələrdən biri Leisford və həmkarlarına məxsusdur. Onlar qeyd edirlər ki, güclü liderin müdaxiləsi olmadan problemlərlə üzləşən məktəblərin dönüş etməsinə dair faktiki olaraq heç bir nümunə yoxdur. Bu, “Uğurlu məktəb liderliyi haqqında 7 əsas iddia”da da öz əksini tapır”.