Elm və Təhsil Nazirliyi tərəfindən müəllimlər üçün “Müəllim” adlı yeni mobil tətbiq istifadəyə verilib. Tətbiq müəllimlərin gündəlik işini asanlaşdırmaq və dərs prosesini mobil telefon üzərindən daha rahat idarə etmək məqsədi daşıyır.

"Azərbaycan müəllimi" tətbiqlə bağlı müəllimləri maraqlandıran bütün sualların cavablarını təqdim edir.

“Müəllim” tətbiqi nə üçündür?

Bu tətbiq mövcud elektron jurnalın mobil versiyası kimi işləyir. Yəni müəllim kompüterə bağlı qalmadan bir çox işləri birbaşa telefonundan görə bilir.

Tətbiqi necə yükləmək olar?

“Müəllim” tətbiqi:

"Android" telefonlar üçün "Google Play",

iOS telefonlar üçün "App Store" platformalarında mövcuddur.

Axtarış bölməsində sadəcə “Müəllim” yazmaq kifayətdir. Tətbiqə giriş yalnız rəqəmsal identifikasiya sistemi olan Digital Login hesabı ilə mümkündür.Sistemdən istifadə tam ödənişsizdir.

Tətbiqdə hansı işləri görmək olar?

“Müəllim” tətbiqi vasitəsilə müəllimlər:

– Dərs cədvəlini günlük və aylıq formada izləyə;

– Şagirdlərin davamiyyətini, qiymətlərini və intizam qeydlərini daxil edə;

– Dərs mövzularını və ev tapşırıqlarını sistemə yerləşdirə;

– Tədris etdiyi fənn üzrə məzmun standartlarını qeyd edə;

– Əməkhaqqı məlumatlarını və detalları görə;

– Əvəzləmə dərslərini (əvəz edən və ya əvəz olunan saatları) izləyə bilərlər.

Tətbiqin əsas üstünlükləri:

– Şəxsi və peşəkar məlumatlara istənilən vaxt, istənilən yerdən çıxış imkanı;

– İş prosesində sadəlik və vaxta qənaət;

– Dərs və qiymətləndirmə işlərinin daha sistemli aparılması.

Bu tətbiqdən kimlər istifadə edə bilərlər?

Hazırda tətbiq yalnız elektron jurnala keçid etmiş ümumi təhsil müəssisələrində çalışan müəllimlər üçün aktivdir. Yəni müəllim sistemdə mövcud olan elektron jurnal istifadəçi məlumatları ilə tətbiqə daxil olur.

Qeyd edək ki, cari mərhələdə “Müəllim” tətbiqi “Rəqəmsal məktəb” layihəsi çərçivəsində Bakı şəhərindəki ümumi təhsil müəssisələrində istifadə olunur. Tətbiqin mərhələli şəkildə ölkə üzrə bütün məktəblərdə tətbiqi planlaşdırılır.