AzMİU futzal yığma komandası pley-off mərhələsinə vəsiqə qazanıb

Azərbaycan Memarlıq və İnşaat Universitetinin (AzMİU) futzal yığma komandası Azərbaycan Tələbə Liqasında növbəti turun oyunları çərçivəsində növbəti mühüm qələbəsini qazanıb. Komandamız Bakı Ali Neft Məktəbinin futzal yığması ilə qarşılaşmada rəqib üzərində 5:1 hesablı inamlı qələbə əldə edib.

"Azərbaycan müəllimi" xəbər verir ki, görüş boyu təşəbbüsü əldən verməyən AzMİU futzalçıları oyunun əvvəlindən etibarən yüksək temp nümayiş etdirib, hücum xəttində effektivlik və müdafiədə etibarlılıqla fərqləniblər. Vurulan ardıcıl qollar komandanın taktiki hazırlığının və kollektiv oyun anlayışının yüksək səviyyədə olduğunu bir daha təsdiqləyib.

Bu qələbə nəticəsində AzMİU futzal yığması Azərbaycan Tələbə Liqasında yarışın bitməsinə bir tur qalmış vaxtından əvvəl pley-off mərhələsinə vəsiqə qazanıb.

Azərbaycan Tələbə Liqasında cari mövsümün oyunlarına dekabrın 19-da yekun vurulacaq.

Qeyd edək ki, Azərbaycan Tələbə Liqası Elm və Təhsil Nazirliyi, Azərbaycan Tələbə Futbol Federasiyası İctimai Birliyinin təşkilatçılığı, Azərbaycan Təhsil İşçiləri Azad Həmkarlar İttifaqı Respublika Komitəsinin, Azərbaycan Futbol Federasiyaları Assosiasiyasının dəstəyi ilə keçirilir.