Akkreditasiya qaydalarında dəyişiklik edilib

“Ötən 3 il ərzində Təhsildə Keyfiyyət Təminatı Agentliyi (TKTA) tərəfindən 35 ali təhsil müəssisində institusional və 40 proqram akkreditasiya qiymətləndirilməsi təşkil edilib. Akkreditasiya komissiyalarının hesabatlarının təhlili, həmçinin beynəlxalq təcrübədən irəli gələn fəaliyyətlər kontekstində akkreditasiya prosesinin optimallaşdırılması və qiymətləndirmə mexanizminin təkmilləşdirilməsi məqsədilə akkreditasiya qaydalarında zəruri dəyişikliklərin edilməsi ehtiyacı müəyyən edilib”.

Bunu “Azərbaycan müəllimi”nə açıqlamasında TKTA-nın İdarə Heyətinin sədri Tural Əhmədov bildirib.

O qeyd edib ki, bu məqsədlə “Təhsil müəssisələrinin akkreditasiyası Qaydaları”na dəyişiklik edilib:

“Qaydalara edilən əlavə və dəyişikliklər akkreditasiya missiyasının məzmununa və fəaliyyətin qiymətləndirilməsinə yeni baxışı ehtiva edir. Sözügedən dəyişikliyə görə, ümumi akkreditasiya göstəricisi 100%-85% (“uyğundur”) və 84%-70% (“əsasən uyğundur”) aralığında olduğu təqdirdə təhsil müəssisəsi növbəti 5 il üzrə akkreditasiyadan keçmiş hesab olunur. Bu keçid göstəricisi daha öncə qüvvədə olan qaydalardakı qiymətləndirmə şkalasından 6% aşağı olduğu üçün təhsil müəssisələri üçün daha əlçatandır. Təlim və tədrisin təşkilinin təhsil müəssisələrinin əsas missiyası olduğunu nəzərə alaraq, bu istiqamətdə fəaliyyətin minimum 70% üzərində olması da zəruri hesab edilir. Belə ki, ümumi göstəricisi 69%-55% aralığında olan təhsil müəssisələri “qismən uyğundur” kimi dəyərləndirilir. Təlim və tədris istiqaməti üzrə də fəaliyyətin qənaətbəxş səviyyədə təşkil edilməməsi (70%-65% aralığı) təkrar akkreditasiya zərurətini yaradır”.