BMU-İNHA İDP üzrə Rəhbər Komitənin iclası keçirilib

Bakı Mühəndislik Universiteti ilə Koreya (Cənubi) Respublikasının İNHA Universiteti arasında icra olunan ikili diplom proqramı (BMU-İNHA İDP) üzrə Rəhbər Komitənin növbəti iclası keçirilib.

BMU-dan "Azərbaycan müəllimi"nə bildirilib ki, iclasda çıxış edən BMU-nun rektoru Yaqub Piriyev İDP çərçivəsində yüksəkixtisaslı kadrların hazırlanmasının təmin olunduğunu və artıq iki məzun buraxılışının həyata keçirildiyini vurğulayıb. Rektor Prezident İlham Əliyevin müvafiq sərəncamı ilə bu il proqramın icra müddətinin 2030-cu ilədək uzadılmasının İDP-yə verilən yüksək dəyərin göstəricisi olduğunu bildirib. Azərbaycan dövlətinin təhsilin inkişafına göstərdiyi diqqət və dəstək nəticəsində ali təhsildə beynəlxalq əməkdaşlıq imkanlarının əhəmiyyətli şəkildə genişləndiyini deyən Yaqub Piriyev İDP tələbələri üçün keyfiyyətli və rəqabətqabiliyyətli təhsil şəraiti yaradıldığını fikirlərinə əlavə edib.

Sonra BMU-İNHA İDP-nin direktoru Humay Cəfərli gündəliyə daxil olan məsələlər barədə geniş hesabatı nəzərə çatdırıb.

İclasda BMU Rəhbər Komitə üzvünün dəyişdirilməsi, 2025-ci ilin qəbul nəticələri, İDP-nin ikinci məzun qrupuna dair ümumi məlumat, o cümlədən məzunlarla bağlı göstəricilər, 2025-ci il yaz semestrinin akademik nəticələri, əldə olunan nailiyyətlər, tələbələrin beynəlxalq yarışlarda uğurları,  habelə 2026-cı təqvim ili üzrə xərclər smetası və İNHA-da IV kurs üzrə fənn dəyişikliyi müzakirə edilib.  

Rektor Yaqub Piriyev, elm və təhsil nazirinin müşaviri Nicat Məmmədli, eləcə də Rəhbər Komitədə təmsil olunan İNHA Universitetinin nümayəndələri gündəlikdə olan məsələlərlə bağlı rəy və təkliflərini bildiriblər. Çıxışlarda, həmçinin BMU ilə İNHA Universiteti arasında qurulan əməkdaşlığın ölkənin ali təhsil sisteminin beynəlxalq rəqabətliliyinin artırılmasına mühüm töhfə verdiyi, insan kapitalının inkişafında xüsusi əhəmiyyət daşıdığı diqqətə çatdırılıb.

Sonra müzakirə olunan məsələlər səsə qoyularaq müvafiq qərarlar qəbul edilib.

İclasda o cümlədən BMU-İNHA İDP-nin ikinci mərhələsi üzrə bir sıra məsələlər, strateji istiqamətlər də nəzərdən keçirilib.  

Qeyd edək ki, Rəhbər Komitənin iclası payız və yaz sessiyası olmaqla, ildə iki dəfə keçirilir. Bundan öncəki iclas Koreyada İNHA Universitetində baş tutub.