Dual peşə təhsili proqramı çərçivəsində təlim təşkil edilib

Dekabrın 11-də Dual peşə təhsili proqramı çərçivəsində işəgötürən müəssisələrin mentorları üçün metodika və pedaqogika üzrə təlim təşkil edilib.

"Azərbaycan müəllimi" xəbər verir ki, təlimin əsas məqsədi mentorların tələbələrlə daha səmərəli işləməsini təmin etmək, onların pedaqoji və metodiki kompetensiyalarını gücləndirmək, eyni zamanda istehsalat təcrübəsinin daha planlı, məqsədyönlü və strukturlaşdırılmış şəkildə həyata keçirilməsinə dəstək göstərmək olub.

Təlimdə Peşə Təhsili üzrə Dövlət Agentliyinin nümayəndəsi, qabaqcıl işəgötürən müəssisələrdən mentorlar, peşə təhsili müəssisələrinin istehsalat təlimi ustaları iştirak edib.

Təlim  prosesində bilik və təcrübə mübadiləsini təşviq etmək və təlimin daha interaktiv keçməsini təmin etmək üçün işəgötürən müəssisələrdən olan mentorlarla yanaşı, seçilmiş peşə təhsil mərkəzlərinin istehsalat təlimi ustaları da təlimə cəlb edilib. Təlim zamanı həm peşə təhsili müəssisələrinin, həm də özəl sektor nümayəndələrinin istehsalat təlimi və təcrübəsi müddətində öyrətmə metodları və tələbələrin öyrənmə prosesi müzakirə edilib.      

Sonda öyrənmə xüsusiyyətlərinə uyğun təlim və təcrübə mühitinin yaradılması məqsədilə işəgötürən müəssisələrdən rəy və təkliflər öyrənilib.

Qeyd edək ki, 2025-ci 2026-cı tədris ilində dual peşə təhsil proqramına 1704 şəxs qəbul olub. Cari tədris ilində həyata keçirilən proqram 27 peşə təhsil müəssisəsində, 18 regionda, 39 ixtisas üzrə 150-dən çox işəgötürənin iştirakı ilə həyata keçirilir. Qəbul olanlardan 1019 nəfəri kişi, 658 nəfəri isə qadındır. Proqramın tətbiqində və genişləndirilməsində əsas məqsəd tərəfdaş nümayəndələr ilə birlikdə təcrübə əsaslı biliklərin tələbələrə ötürülməsi, işəgötürənlərin öz kadr ehtiyaclarına uyğun mütəxəssislər hazırlaması, istedadlı tələbələrin potensial bilik və bacarıqlarının real iş yerlərində aşkar edilməsidir.