Agentlik direktoru: Hər il peşə təhsili müəssisələrinə müraciət edənlərin sayı 10–15 faiz artır

Agentlik direktoru: Hər il peşə təhsili müəssisələrinə müraciət edənlərin sayı 10–15 faiz artır

“Hazırda sənəd qəbulu davam edir, keçən ilin eyni dövrü ilə müqayisədə müraciət edənlərin sayında təxminən 20-30 faiz artım müşahidə olunur. Bu onu göstərir ki, peşə təhsili getdikcə daha çox diqqət mərkəzinə gəlir və bir çoxları üçün real, funksional alternativə çevrilir”.

Bu fikirləri “Azərbaycan müəllimi”nə müsahibəsində Peşə Təhsili üzrə Dövlət Agentliyinin direktoru Ceyhun Kərəmov səsləndirib. 

O qeyd edib ki, rəqəmlərə nəzər yetirməklə, bu marağın artdığını aydın şəkildə görmək mümkündür: “Əgər biz 2020-ci ildə təxminən 14 min nəfəri peşə təhsili müəssisələrinə qəbul etmişdiksə, ötən il bu rəqəm 25 min nəfərə yaxınlaşıb. Bu isə təxminən iki dəfəyə yaxın artım deməkdir.
Ümumilikdə, hər il peşə təhsili müəssisələrinə müraciət edənlərin sayında 10–15 faiz artım olur. Ən çox maraq göstərilən ixtisaslar arasında aşpazlıq, avtomobil təmiri, IT və rəqəmsal texnologiyalar, logistika və tikinti sahələridir”.

Ceyhun Kərəmov qeyd edib ki, indiyədək 28 minə yaxın vətəndaş peşə təhsili almaq üçün müraciət edib: “Müqayisə üçün deyim ki, ötən il qəbulun ilk üç həftəsində bu rəqəm 25-26 min civarında idi. Qarşıda hələ təxminən bir həftəlik müddət var və buna görə də bu il keçənilki göstəriciləri üstələyəcəyimizi deyə bilərik. Bu da onu göstərir ki, ictimai rəydə peşə təhsilinə olan baxış dəyişməkdədir”.