Qısamüddətli kurslar da dual formada təşkil olunsun – Peşə təhsili ilə bağlı TƏKLİF

Peşə təhsili alanların qəbul göstəriciləri göstərir ki, onların arasında 6 aydan - 1 ilədək olan proqramları seçənlərin sayı daha çoxdur. Bu, ümumi qəbuldakı payın 58 faizini təşkil edir.   Statistikaya görə, 2 illik proqramlar üzrə müraciətlər cəmi 9 faiz, 4 illik  proqramlar üzrə isə 5 faiz  təşkil edib. Maraqlıdır ki, 3 illik proqramlara qəbul nisbətən yüksək - 28 faiz olub.

Qəbələ Dövlət Peşə Təhsil Mərkəzinin direktoru Qalib Nəbiyev “Azərbaycan müəllimi”nə açıqlamasında bildirib ki, qısamüddətli kurslara müraciət edənlərin çoxu peşə ixtisasları üzrə baza bilikləri və praktiki bacarıqları olanlardır. Bu da onunla izah oluna bilər ki, son illərdə istər özəl sektorda, istər dövlət sektorunda işçi heyətin ixtisasları üzrə dövlət nümunəli sənədlərinin olub-olmadığı monitorinq olunur. Hətta “Dövlət satınalmaları haqqında” qanuna əsasən, Antiinhisar və İstehlak Bazarına Nəzarət Dövlət Agentliyinin keçirdiyi tenderlərdə iştirak edən özəl və dövlət müəssisələrindən işçilərinin peşəkarlıq sertifikatları tələb edilir. Ona görə də artıq şirkətlərdə dövlət nümunəli sertifikatların olması üzrə tələblər formalaşıb.

Mərkəz direktorunun fikrincə, ixtisaslı kadrların dövlət nümunəli sertifikatlara sahib olmasına diqqət yetirməsi müsbət haldır. Bu tendensiya öz növbəsində peşə təhsil müəssisələrinə müraciətlərin artmasında özünü göstərir.

Qalib Nəbiyevin fikrincə, peşə təhsili müəssisələrinin artan nüfuzunun da bu artımda böyük payı var: “Düşünürəm ki, ötən dövrlərdən fərqli olaraq bu gün peşə təhsil müəssisələrinə müraciət edən vətəndaş həm nəzəri, həm də praktiki bacarıqları mütləq şəkildə əldə edir. Çünki bu istiqamətdə kifayət qədər zəngin infrastrukturun olduğu müşahidə olunur”.

Qalib Nəbiyev dövlət nümunəli sertifikata olan etimada da toxunub: “Elm və Təhsil Nazirliyinin verdiyi sertifikat şəxsin əmək bazarına daxil olmasında çox böyük rol oynayır. Bu günə qədər Azərbaycanda bir çox MMC-lər və fiziki şəxslər tərəfindən müxtəlif kurslar açılırdı və bu kursları bitirənlərə hüquqi əsası olmayan sertifikatlar təqdim edilirdi. Həmin sertifikatların artıq əhəmiyyəti qalmayıb. İnsanlar anlayırlar ki, fəaliyyəti elanlardan ibarət olan müəssisələr tərəfindən təqdim olunan bu cür sertifikatların əmək bazarında hüquqi əsası yoxdur”.

Q.Nəbiyev əlavə edib ki, peşə təhsil müəssisələrində verilən həm qısamüddətli, həm də ənənəvi peşə təhsil səviyyələri üzrə — texniki və yüksək texniki peşə təhsili üzrə əldə olunan diplom və sertifikatlar bu gün artıq əmək bazarında öz yerini tapır: “Düşünürəm ki, bundan sonra qısamüddətli proqramların, kursların sayını artırmaq lazımdır. Bu istiqamətdə elan və PR işləri daha da gücləndirilməlidir. Çünki yerli müəssisələr, mikro, kiçik və orta sahibkarlıq subyektləri üçün daha tez fayda verən məhz belə kurslardır”.

Q.Nəbiyev təklif edir: “Ən yaxşı yanaşmalardan biri isə gələcəkdə bu istiqamətdə dual proqramların təşkili ola bilər. Düşünürəm ki, qısamüddətli kursların dual formada təşkili daha məqsədəuyğundur. Çünki müəssisələrin bir çoxu nəzəri biliklərin verilməsi üçün şərait yarada bilir — auditoriyalar, dərs otaqları təqdim edirlər. Biz mütəxəssislər tərəfindən nəzəri bilikləri veririk, digər tərəfdən isə praktiki bacarıqlar birbaşa müəssisənin özündə formalaşdırılır. Bu səbəbdən qısamüddətli dual kursların təşkili daha effektiv ola bilər. Ümid edirəm ki, bu istiqamətdə işlər daha da intensivləşəcək. Çünki peşə təhsili sahəsində son illərdə aparılan islahatlar, xüsusilə Böyük Qayıdışa dair Dövlət Proqramı çərçivəsində həyata keçirilən qısamüddətli kurslar çox böyük əhəmiyyət kəsb etdi.

Bu kurslar göstərdi ki, peşə təhsil müəssisələri qısa müddətdə yüksək səviyyəli, peşəkar təlimlər təşkil edə bilir və bu, cəmiyyətə açıq şəkildə nümayiş etdirildi. Məsələn, Böyük Qayıdışa dair Dövlət Proqramı çərçivəsində Qəbələ Dövlət Peşə Təhsil Mərkəzində 200-ə yaxın keçmiş məcburi köçkün qısamüddətli kursları bitirərək sertifikat əldə edib. Hazırda onların bir qismi turizm sahəsində, digər qismi isə kənd təsərrüfatı sahəsində fəaliyyət göstərir. Bu, həqiqətən də sevindirici haldır. Digər tərəfdən, bu proqram həm dövlətimizin həyata keçirdiyi ən mühüm və qabaqcıl layihələrdən biri olmaqla yanaşı, peşə təhsilinin cəmiyyətdə əhəmiyyətini bir daha ön plana çıxardı”.