Xadiməlikdən tələbəliyə gedən yol : 65 yaşında tələbə oldu 

Oxumaq, öyrənmək heç zaman gec deyil. Son zamanlar xüsusən də peşə məktəblərində yaşın heç də təhsilə mane olmadığını görürük.

“Azərbaycan müəllimi” Ordubad Peşə Liseyinin “Xalçaçı” ixtisasında təhsil alan 65 yaşlı Mətanət Nəcəfova ilə həmsöhbət olub.

O, 1960-cı il aprelin 8-də Ordubad şəhərində anadan olub. 1967-ci ildə 1 nömrəli tam orta məktəbə daxil olub. 1983-cü ildə orta təhsilini bitirib. İlk əmək fəaliyyətinə 23 mart 1977-ci ildə Ordubad Baramaçılıq fabrikində toxucu peşəsi üzrə şagird vəzifəsində başlayıb. 1977-ci ildə toxucu vəzifəsinə qəbul edilib. 1977-ci ildə isə işdən ayrılıb.

1980-ci ildə ailə həyatı quran Mətanət xanımın 2 oğlu, 1 qızı və 5 nəvəsi var. Deyir ki, işdən çıxandan sonra Ordubad Texniki Peşə və Sürücülük məktəbində xadimə vəzifəsində çalışıb: “O vaxtdan xalçaçılığa marağım olub, boş vaxtlarımda gəlib tələbələrdən xalça toxumağı öyrənirdim. Təqaüdə çıxandan sonra baxdım ki, belə bir xalçaçılıq qrupu var, mən də sənədlərimi verib buraya tələbə kimi gəldim”.

65 yaşlı tələbə deyir ki, bu adı qazandığını eşidəndə çox sevinib: “Sonra fikirləşdim ki, mən gedib necə oxuyacağam, necə toxuyacağam. Dərsə başlayandan sonra gördüm ki, məndən yaşca böyük tələbələr də var, daha da çox həvəsləndim. Elə həvəslə də dərs oxumağa, xalça toxumağa başladım”.

Təcrübəsi olduğu üçün toxumada çox da çətinliyi yoxdur: “Həvəslə yanaşdım, həvəslə toxuyuram, ona görə də çətinlik çəkmirəm. Gələcəkdə toxuculuq fabriki açılsa, həvəslə də gedib işləyərəm. Həm də Ordubadın məşhur Göygölünün, dağlarının mənzərəsini də toxumaq istəyirəm”.

Mətanət nənə Ordubadın milli adət-ənənəsi olan xalçaçılıq sənətinin itib-batmaması üçün onu evdə qızına, gəlinlərinə, nəvələrinə də öyrətmək istəyir.