Türkiyənin peşə ixtisası üzrə 47 dərsliyi Azərbaycan dilinə uyğunlaşdırılır

Türkiyənin peşə ixtisası üzrə 47 dərsliyi Azərbaycan dilinə uyğunlaşdırılır

Azərbaycan və Türkiyə arasında 19 fevral 2021-ci il tarixində Ankara şəhərində imzalanmış Peşə Təhsili Sahəsində Əməkdaşlığa dair Protokol çərçivəsində iki qardaş ölkə arasında tərəfdaşlıq münasibətləri davamlı şəkildə inkişaf etdirilir.

Peşə Təhsili üzrə Dövlət Agentliyindən “Azərbaycan müəllimi”nə verilən məlumata görə, əməkdaşlıq çərçivəsində indiyədək 150-yə yaxın pedaqoji heyət nümayəndəsi Türkiyənin Ankara, Antalya, Bursa, İzmir və İstanbul şəhərlərində fəaliyyət göstərən peşə təhsili müəssisələrində təşkil edilən təlim proqramlarında iştirak edib. Təlimlər zamanı müəllim və mütəxəssislər arasında bilik və bacarıqların qarşılıqlı ötürülməsi, metodoloji yanaşmaların müqayisəsi və qarşılıqlı öyrənməyə əsaslanan peşəkar təcrübə mübadiləsi həyata keçirilib.

Bu əməkdaşlığın davamı olaraq, Türkiyə Respublikası Milli Təhsil Nazirliyinin Peşə və Texniki Təhsil Baş İdarəsinin müdiri Salih Kaygusuzun rəhbərlik etdiyi nümayəndə heyəti 15–18 iyun 2025-ci il tarixlərində Azərbaycanda səfərdə olub.

Səfər çərçivəsində nümayəndə heyəti Cəlilabad Dövlət Peşə Təhsil Mərkəzi, Lənkəran Dövlət Peşə Təhsil Mərkəzi, Texnika və Texnologiyalar üzrə Bakı Dövlət Peşə Təhsil Mərkəzi və Sənaye və İnnovasiyalar üzrə Bakı Dövlət Peşə Təhsil Mərkəzində təşkil olunmuş görüşlərdə iştirak edib, təhsil müəssisələrinin maddi-texniki bazası, tədris avadanlıqları və infrastruktur imkanları ilə yaxından tanış olub. Daha sonra Sənaye və İnnovasiyalar üzrə Bakı Dövlət Peşə Təhsil Mərkəzində “Azərbaycan və Türkiyənin peşə təhsili sistemlərinin qarşılıqlı təcrübə mübadiləsi” mövzusunda dəyirmi masa təşkil olunub. Tədbirdə çıxış edən Peşə Təhsili üzrə Dövlət Agentliyinin direktoru Ceyhun Kərəmov peşə təhsilində beynəlxalq təcrübəyə əsaslanan metodlardan istifadə olunduğunu vurğulayıb. O, iki ölkə arasında qarşılıqlı öyrənməyə əsaslanan birgə dərslərin təşkili, ortaq təhsil müəssisələrinin yaradılması imkanlarından bəhs edib. Ceyhun Kərəmov, həmçinin, Türkiyədə hazırlanmış müxtəlif ixtisaslar üzrə 47 adda dərsliyin Azərbaycan dilinə uyğunlaşdırılması istiqamətində görülən işləri də xüsusi qeyd edib.

Tədbirdə çıxış edən Salih Kaygusuz əməkdaşlığın yalnız təlim proqramları ilə məhdudlaşmadığını, müəllim hazırlığı, pedaqoji ünsiyyət və “Qardaş məktəb” layihələri çərçivəsində də inkişaf etdiyini bildirib. O, Azərbaycanda Türkiyə modeli əsasında fəaliyyət göstərəcək iki pilot peşə liseyinin yaradılması üzrə işlərin davam etdiyini diqqətə çatdırıb.

Görüşlərdə tərəflər arasında gələcək əməkdaşlığın təhsilverənlərin Türkiyədə təlimlərinin davam etdirilməsi,  Türkiyəli təhsilverənlərin və idarəedicilərin Azərbaycanın peşə təhsil müəssisələrinə mübadilə səfərlərinin təşkili, qardaşlaşmış müəssisələrin fəaliyyətinin sistemləşdirilməsi, qısamüddətli tələbə mübadilə proqramlarının həyata keçirilməsi, Türkiyə təcrübəsi əsasında birgə tədqiqat və inkişaf mərkəzlərinin qurulması barədə razılığa gəlinib.