Astarada müəllimlərlə inklüziv təhsilin əhəmiyyəti müzakirə edilib

Astara rayonu üzrə ingilis dili müəllimləri üçün “Tədrisdə inklüziv mühitin əhəmiyyəti” mövzusunda maarifləndirici təlim baş tutub.

"Azərbaycan müəllimi" xəbər verir ki, təlim Elm və Təhsil Nazirliyi yanında İctimai Şuranın katibi Günay Əkbərovanın təşəbbüsü və Lənkəran-Astara Regional Təhsil İdarəsinin dəstəyi ilə həyata keçirilib.

Təlim Astara rayonu, Yalçın Nəsirov adına Sərək kənd tam orta ümumtəhsil məktəbində təşkil olunub və Astara rayonu üzrə təhsil sektorunu təmsil edən müəllimləri bir araya gətirib.

Təlimdə Astara rayonu üzrə təhsil sektorunun müdiri Əliyeva Xədicə iştirak edərək çıxış edib, inklüziv tədrisin müasir təhsil sistemində rolu, müəllimlərin bu prosesdə üzərinə düşən məsuliyyət və davamlı peşəkar inkişafın əhəmiyyəti barədə fikirlərini bölüşüb. Xarici dil üzrə mütəxəssis və təlimçi Günay Əkbərova çıxışında inklüziv mühitin yalnız xüsusi ehtiyaclı şagirdlər üçün deyil, bütün şagirdlərin akademik və sosial inkişafı üçün vacib olduğunu vurğulayıb, real sinif nümunələri və praktik yanaşmalar əsasında müəllimlərlə interaktiv müzakirələr aparıb.

Tədbirin sonunda Günay Əkbərova tərəfindən müəllimlərə kitab hədiyyələri təqdim olunub. Təlim iştirakçıları görüşün faydalı və motivasiyaedici olduğunu qeyd edərək bu kimi maarifləndirici təşəbbüslərin davamlı olmasının vacibliyini vurğulayıblar.