Bəzi suallar ilk baxışda anlaşılmaz görünürdü - Beynəlxalq olimpiadanın qalibi 

 

Azərbaycan Texniki Universitetinin (AzTU) “İnformasiya texnologiyaları və telekommunikasiya” ixtisasının tələbəsi Aylin Quliyeva 5 dekabr 2025-ci il tarixində Türkmənistan Respublikasının Təhsil Nazirliyi və Seyitnazar Seydi adına Türkmən Dövlət Pedaqoji İnstitutunun təşkilatçılığı ilə keçirilən V Açıq Beynəlxalq internet Fizika Olimpiadasında I dərəcəli diploma layiq görülüb.

“Azərbaycan müəllimi” gənc tələbənin uğur hekayəsini dinləyib.

Aylin Quliyeva Gəncə şəhər M.Mehdizadə adına 4 nömrəli xarici dil təmayüllü məktəb-liseyinin məzunudur. O, qəbul imtahanlarında 559,6 bal toplayaraq Azərbaycan Texniki Universitetinə daxil olub.

Gənc tələbə Türkmənistanda qazandığı uğuru belə dəyərləndirir: “Bu mənim üçün həm böyük şərəf, həm də zəhmətin nəticəsi deməkdir. Uğurum təkcə mənim deyil, müəllimlərimin və ailəmin dəstəyinin nəticəsidir. Bu nailiyyət mənə göstərdi ki, çalışqanlıq və davamlı hazırlıq hər zaman öz bəhrəsini verir”.

Onun sözlərinə görə, olimpiada zamanı ən çətin məqam müxtəlif ölkələrdən olan iştirakçıların fərqli düşüncə tərzləri və problem həll etmə üsulları ilə qarşılaşmaq olub: “Bəzi suallar ilk baxışda anlaşılmaz görünürdü. Onları düzgün yanaşma ilə analiz etmək və səbirli olmaq vacib idi”.

Hazırlıq prosesinin kifayət qədər vaxt və əzm tələb etdiyini bildirən gənc qeyd edir ki, bu mərhələdə həm nəzəri biliklərini dərinləşdirib, həm də praktiki tapşırıqlar üzərində intensiv çalışıb: “Müəllimlərimin rəhbərliyi altında problem həll etmə bacarığımı inkişaf etdirdim və beynəlxalq səviyyəli tapşırıqlara uyğun strategiyalar öyrəndim”.

AzTU-da “İnformasiya texnologiyaları və telekommunikasiya” ixtisasını seçməsini də məhz bu maraqla əlaqələndirən Aylin bildirir ki, bu sahə gələcək üçün böyük imkanlar yaradır: “Bu ixtisas mənim elmi və texnoloji maraqlarıma uyğundur. Gələcəkdə texnologiyanın inkişafına töhfə vermək və öz bacarıqlarımı təkmilləşdirmək istəyirəm”.

Aylindən müasir elmdə süni intellektin rolu barədə də fikirlərini öyrəndik. Onun sözlərinə görə, süni intellekt fizika və texnologiya sahəsində tədqiqatların aparılmasını xeyli asanlaşdırır: “Süni intellekt fizika və texnologiyada işimizi asanlaşdırır, problemlərin daha tez həllinə və eksperimentlərin virtual şəkildə sınaqdan keçirilməsinə kömək edir. Onun üstün cəhəti ondan ibarətdir ki, bu imkanlar yeni kəşflər etməyə şərait yaradır”.

Bununla yanaşı, tələbə süni intellektdən istifadə zamanı balansın qorunmasının vacibliyini də vurğulayır: “Müsbət tərəfi ilə yanaşı mənfi tərəfi də var. Mənfi tərəfi həddən artıq asılılıq yaratması və bəzi sahələrdə iş imkanlarının azalması ola bilər. Əsas odur ki, süni intellekt insanın köməkçisi olsun, əvəzləyicisi yox”.

Aylin süni intellektdən şəxsi hazırlıq prosesində də istifadə etdiyini deyir. Onun sözlərinə görə, bu texnologiya xüsusilə biliklərinin möhkəmləndirilməsində faydalı olub: “Olimpiadaya hazırlaşarkən mövzuları daha aydın başa düşmək, çətin tapşırıqların izahını almaq və etdiyim səhvləri yoxlamaq üçün süni intellektin imkanlarından yararlanırdım. Eyni zamanda universitet imtahanlarına hazırlaşanda da mövzuların təkrarında və tapşırıqların izahında mənə kömək edirdi”.

Gələcək planlarından danışan Aylin elmi-tədqiqat fəaliyyətində iştirak etmək, innovativ texnoloji layihələr üzərində çalışmaq və təhsilini beynəlxalq səviyyədə davam etdirmək niyyətində olduğunu bildirib: “Məqsədim əldə edəcəyim bilik və təcrübəni gələcəkdə ölkəmə fayda vermək üçün istifadə etməkdir”.