“Mediada gənclərin hüquqi mübarizəsi” layihəsi davam edir

“Mediada gənclərin hüquqi mübarizəsi” layihəsi davam edir

Azərbaycan Respublikası Gənclər Fondunun “Konstitusiya və Suverenlik İli” çərçivəsində elan etdiyi fərdi qrant müsabiqəsinin qalibi olan “Mediada gənclərin hüquqi mübarizəsi” layihəsi hazırda uğurla icra olunur.

"Azərbaycan müəllimi" xəbər verir ki, layihənin əsas məqsədi gənclərin Konstitusiya hüquqları, hüquqi maarifləndirmə, media savadlılığı və hüquqi mübarizə mexanizmləri üzrə bilik və bacarıqlarının artırılmasıdır. Bu istiqamətdə layihə çərçivəsində mütəmadi maarifləndirici təlimlər təşkil edilir, iştirakçıların hüquqi düşüncə tərzinin formalaşmasına və hüquqi məsələlərə məsuliyyətli yanaşmasına xüsusi diqqət yetirilir.

Layihə çərçivəsində keçirilən növbəti təlim fakt yoxlama (fact-checking) mövzusuna həsr olunub. Təlim zamanı mediada yayılan məlumatların etibarlılığının qiymətləndirilməsi, dezinformasiyanın və saxta xəbərlərin aşkarlanması, mənbələrin yoxlanılması və etibarlı informasiya ilə işləmə prinsipləri iştirakçılara ətraflı şəkildə izah edilib. Eyni zamanda, faktların hüquqi baxımdan düzgün təqdim olunması, hüquqi terminlərin dəqiq işlədilməsi və yanlış məlumatın yaratdığı hüquqi nəticələr barədə praktik yanaşmalar təqdim olunub.

Təlimdə informasiya təhlükəsizliyi, hüquqi mövzuların mediada obyektiv və məsuliyyətli şəkildə işıqlandırılması, ictimai rəyin formalaşmasında fakt yoxlamanın rolu real nümunələr əsasında izah edilib. İnteraktiv formatda təşkil olunan sessiya gənclərin aktiv iştirakı, sual-cavab, qrup müzakirələri və fikir mübadiləsi ilə yadda qalan, faydalı mühitdə baş tutub.

Qeyd edək ki, layihə çərçivəsində təlimlərin təşkili və informasiya dəstəyi “Azərbaycan müəllimi” redaksiyasının region təmsilçisi, Gunboyu.az saytının redaktoru Aynur Araz tərəfindən həyata keçirilir.

Layihə çərçivəsində maarifləndirici təlimlərin növbəti mərhələlərdə də davam etdirilməsi, daha çox gəncin prosesə cəlb olunması və mövzuların praktik tapşırıqlar üzərindən dərinləşdirilməsi nəzərdə tutulur.