Təhsil tələbə krediti ilə oxudu, MİQ-də yüksək nəticə göstərən müəllim oldu

Bir qız üçün təhsil nədir, nə ifadə edir? – deyə soruşsanız, bəlkə də hər qız buna eyni cür cavab verəcək. Çünki təhsil, hər qız üçün, demək olar ki, eyni anlam ifadə edir. Amma nəzərə alanda ki, bir qızın təhsili, sadəcə onun özü üçün yox, bütövlükdə cəmiyyət üçün çox önəmlidir, onda qızların hamısı üçün eyni məna kəsb edən bu amilin əhəmiyyəti hər birimiz üçün birə-beş artır. Belə ki, təhsil alan bir qız  yalnız fərdi inkişaf deyil, həm də təhsilli bir ailə və cəmiyyətin formalaşması, qadınların iqtisadi və sosial həyatda tam iştirakı deməkdir, cəmiyyətdə  gender bərabərliyinin təminatıdır, daha savadlı nəsillərin yetişməsidir.

Hər gün dediyimiz, oxuduğumuz, yazdığımız bu fikirlər Vüsalə Quliyevanın timsalında necə də aydın görünür. Xüsusən də “Daha savadlı nəsillərin yetişməsi” məsələsi onun təhsilinin qayəsi ilə lap üst-üstə düşür.

“Kimdir Vüsalə Quliyeva?”, - deyə soruşsanız, o, bir gənc qızdır. Hələ ömrünün baharındadır. 21 yaşı yenicə tamam olub və artıq müəllimliyə başlayıb. Özü də necə müəllim! Elə ilk addımdaca yaşadığı rayon üzrə ən yüksək ballı müəllimlər sırasında olmağı bacarıb.

Biz ancaq nəticələrlə maraqlanırıq, elə deyilmi? Bəs bilirikmi, o bu nəticəyə nail olana qədər hansı yollardan keçib? Maraqlanırıqmı ki, necə oxuyub, böyüyərkən düşüncələrində dərin izlər qalıbmı? Kim yetişdirib, ayaqları üstündə durmaq üçün əlindən kim tutub, kimdən dəstək alıb?

Ürəyində atasının qabarlı əlinin izi qalıb

Vüsalə Quliyeva Cəlilabadda anadan olub. Cəlilabad şəhərindəki Rəşad Abdullayev adına 2 nömrəli tam orta məktəbdə oxuyub. Məzun olana qədər illəri heç asan keçməyib. Atası usta, anası II qrup əlil olan Vüsalənin yaddaşında məktəbə ilk dəfə ayaq basdığı o gün nə ilə qalıb, bilirsinizmi? Atasının onun yumşaq, balaca əllərindən tutan qabarlı əlləri ilə: “Usta ailəsində doğulmuşam. Mən birinci sinfə gedəndə maddi vəziyyətimiz yaxşı deyildi. Atam gecə-gündüz çalışırdı, bəzən gecəni də gəlmirdi, amma səhər özünü mütləq evə çatdırır, yorğunluğuna baxmayaraq, məni məktəbə aparırdı. Hər dəfə əlimi əlinə alanda əllərindəki qabar diqqətimi çəkir, fikrimi məşğul edirdi”.

O illərdə onun diqqətini çəkən, sadəcə atasının ağır gecələri, çətin gündüzləri, bərkiyən əlləri deyildi, həm də ibtidai sinif müəlliminin atasınınkından fərqli olaraq yumşaq əlləri, səliqəli görkəmi olurdu. Atasının möhkəm, güvənli əllərindən sonra müəlliminin etibarlı, qayğıkeş əlləri ona çətinlikləri unutdurur, gələcəyinə ümid yaradırdı. O ümid bu balaca ürəyi isidir, gələcəkdə kim olacağına dair qərarını möhkəmlədirdi. Bu qətiyyətlə məsuliyyətli abituriyent olub, Azərbaycan Dövlət Pedaqoji Universitetinin Cəlilabad filialının “İbtidai sinif müəllimliyi” ixtisasını seçərək tələbə olmaq şansı qazanıb.

Həm oxudu, həm işlədi

Pedaqoji təhsilini ödənişli almaq onun üçün bir seçim idi, seçməyə də bilərdi, amma seçdi. Çünki müəllim olmaq üçün tələsirdi. Nəinki bir ilini, heç bir gününü də itirə bilməzdi. Axı hər bir il müəllimlikdə önəmli təcrübə deməkdir. O da bu ili itirməyərək təhsil almağa başlayıb. Ödənişli təhsili seçərkən kimə güvənib? Təbii ki, əli qabarlı atasına, qızını təhsilli görməyi arzulayan anasına, onun oxumağı üçün hər şeyə hazır olan ailəsinə və dövlətinə.

Dövlətin həyata keçirdiyi sosial layihə - təhsil tələbə krediti ilə bağlı məlumatı görən kimi ondan yararlanmaq qərarına gəlib. İlk semestrdən sonuncu semestrə qədər bütün təhsil dövrünü təhsil tələbə krediti ilə oxuyub: “Anam II qrup əlildir. Ona görə də təhsil tələbə kreditinin “Sosial kredit” növündən yararlandım”.

Oxuyub qurtarandan sonra yaxşı müəllim olmaq istəyirdi. Ona görə də bir yerdə dayanmayıb, mütəmadi olaraq öz üzərində işləyib, fəal tələbə olub: “İlk tədris ilimdən etibarən rayonumuzda yerləşən “Paradoks” Tədris və İnkişaf Mərkəzində kompüter proqramlarını tədris etmişəm, artq 3 ildir ki, bu sahə üzrə də çalışıram. 4 illik tələbə həyatımda universitetdə fərqlənmişəm”.
Fərqləndiyi üçün də təqaüdlə oxuyub: “Orta müvəffəqiyyət göstəricim yüksək olduğu üçün həm dövlət təqaüdü ilə oxudum, həm də təhsil tələbə kreditinin geri ödənişində ciddi güzəşt əldə etdim, faiz ödəməkdən azad olundum”.

Müəllimliyə ilk addım, ilk uğur

Universitetdən ötən il məzun olan Vüsalə Quliyeva 2025-ci il müəllimlərin işə qəbulu imtahanlarında yüksək nəticə göstərərək rayon üzrə fərqlənib: “2025-ci ildə universteti başa vurub müəllimlərin işə qəbulu müsabiqəsinə qatıldım. Məhz həmin il müəllimlərin işə qəbul imtahnında  90 bal toplayaraq Cəlilabad şəhər 9 nömrəli tam orta məktəbdə ibtidai sinif müəllimi kimi işə başladım. Hazırda I siniflərə dərs deyirəm”.

İlk dəfə sinfə girdiyi o gün də atası yanındaydı: “İlk dərs günümdə atam yanımdaydı. O gün birinci sinfə getdiyim günü xatırladım. Heç bir cümlə, heç bir söz ogünkü duyğularımı ifadə etməyə kifayət deyil. 9 nömrəli məktəbin həyətində dövlət himni səslənirdi və atam ən arxa sıralarda əllərini yanına salıb dayanmışdı. Gözləri məndə idi, bu dəfə məni birincilərin arasında yox, müəllimlərin arasında izləyirdi. O gün özümə söz verdim. Bu gün sinfimə daxil olan hər uşaq da mənim yaşadıqlarımı yaşayacaq. Onların da anası, atası onlara atam mənə baxdığı kimi baxacaq”.

Təhsil krediti utanc hissindən azad etdi

“Atam mənimlə qürur duyurdu və bu qürurda təhsil tələbə kreditinin payı çox böyükdür”, – deyən Vüsalə Quliyeva müəllimlik üçün ödənişli təhsil almaq yolunu tərəddüdsüz seçsə də, atasının maddi vəziyyəti bu seçiminə görə onu utandırırdı. Ona görə də təhsilini kredit ilə oxuyub, sonra bunu öz maaşı ilə ödəyə biləcəyini öyrənməsi onu bir anda mənəvi yükdən xilas edib: “Təhsil tələbə krediti sayəsində ödənişli oxumağın yaratdığı utanc hissindən azad olmuşdum. Bunun sayəsində kasıb ailəmə yük olmayacaqdım. Ödənişli oxumağa qərar versəm də, tədris ili başlayana qədər ürəyimdəki qorxu məni tərk etmirdi. “Birdən ödəyə bilmərik”, “Təhsilim yarımçıq qalar” kimi qorxularım vardı.  Amma təhsil tələbə krediti ilə bunları düşünməyimə ehtiyac qalmamışdı. Rahatlıqla bütün diqqətimi oxumağa, təhsilimə, təcrübəmi artırmağa yönəldə bilərdim. Həyatımda stres yaradan suallara yer qalmamışdı”.

Vüsalə Quliyevanı dinlədikcə, təhsil tələbə krediti “sehirli əl” kimi gəlir adama, elə deyilmi? Bu “sehirli əl”in toxunduğu həyatların sayı ildən-ilə artır. Onlardan sadəcə biridir Vüsalə. O əlin gözəlləşdirdiyi minlərlə həyatdan biridir Vüsalə müəllimin həyatı.
Təhsil tələbə krediti Vüsalə üçün mənəvi yükdən xilas yoludur. Amma yüzlərlə qız üçün təhsil krediti yeganə çıxış yoludur, yüzlərlə gənci iqtisadiyyata, təhsilə, elmə qazandıran variantdır, yüzlərlə ailələri borc yükündən qurtaran amildir. Təhsil tələbə krediti dövlətin təhsilli, uğurlu gənclərin sayının çox olması üçün uzatdığı əldir. Dövlətin bu sosial layihəsi övladına qürurla baxan milyonlarla valideyn deməkdir. Odur ki, çarəsiz qalmağı gözləməyək, uzanan bu əldən bərk-bərk yapışıb qızlarımıza təhsil, oğlanlarımıza uğurun açarını verək, sonra qürurla uzaqdan seyr edək!