MEK-də növbəti könüllülük proqramı uğurla başa çatıb

MEK-də növbəti könüllülük proqramı uğurla başa çatıb

Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) təşkil olunan üçüncü könüllülük proqramı uğurla yekunlaşıb.

Tədbiri giriş sözü ilə açan MEK-in direktoru texnika elmləri doktoru Hüseyn Hüseynov Azərbaycan Gəncləri Günü münasibətilə tədbir iştirakçılarını təbrik edib. Direktor qeyd edib ki, müasir Azərbaycan gəncliyi ölkənin həm elmi, həm də yaradıcı potensialının əsas hərəkətverici qüvvəsidir. O, könüllülərin kitabxanadakı fəaliyyətini yüksək qiymətləndirərək, bu cür proqramların gənclərin gələcək karyerasında mühüm tramplin rolunu oynadığını vurğulayıb.

MEK rəhbəri bildirib ki, üç ay ərzində könüllülər kitabxana mühitində praktiki təcrübə qazanmaqla yanaşı, kitabxananın müxtəlif şöbə və fondlarında çalışaraq komanda işi, vaxtın idarə olunması, istifadəçilərlə ünsiyyət kimi bacarıqlarını da inkişaf etdirməyə imkan tapıblar.

 Könüllülər tərəfindən “Şəhərsalma və Memarlıq İli”nə töhfə olaraq, MEK-in binasının xüsusi dəqiqliklə işlənmiş maketini hazırladığını diqqətə çatdıran direktor, bu təşəbbüsün könüllülərin müasir Azərbaycan memarlığına olan marağını və kitabxanaya olan bağlılığını simvolizə etdiyini qeyd edib.

 Tədbir zamanı MEK-in elmi katibi, “MEK könüllüləri” proqramına məsul şəxs Şəbnəm Rüstəmova könüllülərin fəaliyyəti barədə təqdimatla çıxış edib. Bildirilib ki, könüllülər kitabxananın bütün sahələrində öz potensiallarını sınamaq imkanı əldə ediblər və nəzəri biliklərini praktiki bacarıqlarla möhkəmləndiriblər. Onlar, kitabların inventar nömrələrinə görə sıralanması, topoqrafik kartoçkaların hazırlanması, sənədlərin işlənməsi və elektron kataloqa daxil edilməsi, nəşrlərin rəqəmsallaşdırılması kimi müxtəlif işlərə cəlb olunublar. Bundan başqa, oxuculara xidmət göstərərək sənəd sifarişlərini yerinə yetiriblər.

Daha sonra MEK könüllülərinin fəaliyyəti haqqında videoçarx izlənilib.

Tədbirdə çıxış edən könüllülər onlara yaradılan geniş imkanlara görə kitabxana rəhbərliyinə öz dərin minnətdarlıqlarını bildiriblər. Gənclər MEK-də keçirdikləri müddətin onlara peşəkar vərdişlər qazandırdığını, yaradıcı ideyalarının dəstəklənməsinin isə onlarda özünəinam hisslərinin artırdığını qeyd ediblər.

Tədbirin sonunda könüllülük proqramını müvəffəqiyyətlə başa vuran bir qrup gəncə sertifikatlar təqdim olunub. Direktor könüllülərə gələcək fəaliyyətlərində uğurlar arzulayaraq, onların kitabxana ilə əlaqələrinin hər zaman davamlı olacağını bildirib.