MEK-də “Azərbaycan qadınlarının dünya elminə töhfəsi” adlı tədbir keçirilib

MEK-də “Azərbaycan qadınlarının dünya elminə töhfəsi” adlı tədbir keçirilib

AMEA-nın Mərkəzi Elmi Kitabxanasında (MEK) 11 Fevral – Qadınlar və Qızlar Elmdə Beynəlxalq Gününə həsr olunan “Azərbaycan qadınlarının dünya elminə töhfəsi” adlı tədbir keçirilib. Tədbir Mərkəzi Elmi Kitabxananın Qadınlar Təşkilatının təşkilatçılığı ilə keçirilib.

Tədbiri giriş nitqi ilə açan Təşkilatın sədri, Qarabağ müharibəsi qəhrəmanları fondunun rəhbəri Röksanə Səfərzadə tarixin bütün dövrlərində Azərbaycan qadını mərdliyi, vətənpərvərliyi, millətinə, torpağına olan məhəbbəti ilə nəsillərə örnək olduğunu, həm milli oyanış, maarifləndirmə, publisistika sahəsində tarixi rol oynamış, həm də ədəbiyyatın, təhsilin, musiqinin şeiriyyatın inkişafına özlərinin incə ruhları ilə təsir göstərdiklərini vurğulayıb.

Röksanə Səfərzadə çıxışı zamanı bu gün tarixin ən qüdrətli dövrünü yaşayan, qalib ölkənin qadınları kimi Azərbaycan qadının ölkəmizin ictimai-siyasi, mədəni həyatında mühüm rol oynadıqlarını diqqətə çatdırıb.

Sonra AMEA-nın Qadınlar Şurasının sədr müavini fəlsəfə üzrə fəlsəfə doktoru Mahrux Nəcəflinin texnoloji innovasiyaların gender bərabərliyinə təsiri mövzusunda çıxışı dinlənilib. Elm və texnologiyanın sürətli inkişafı fonunda qadınların innovativ sahələrə inteqrasiyasının əhəmiyyətini ön plana çəkildiyini diqqətə çatdıran M.Nəcəfli innovativ yanaşmaların elmi tədqiqatlarda səmərəliliyi artırdığını və qadınların STEM- elm, texnologiya, mühəndislik, riyaziyyat sahələrində imkanlarını genişləndirdiyini vurğulayıb.

Daha sonra MEK-in Kitabxana xidməti üzrə direktor müavini fil.ü.f.d. Şəhla Quliyeva Beynəlxalq Qadınlar və Qızlar Gününün tarixindən danışaraq günün əsas məqsədlərindən olan gender bərabərsizliyinin elmdə qlobal miqyasını, qızların erkən yaşlardan elmdən uzaqlaşması problemini, elmdə qadınların töhfələrinin görünməzliyini, elmi innovasiya və qərarvermədə müxtəlifliyin əhəmiyyətini şərh edib.  O, həmçinin bu günün təsis edilməsində əsas məqsədlərdən biri kimi dövlətlərin, beynəlxalq təşkilatların, akademik institutların və vətəndaş cəmiyyətinin elmdə gender bərabərliyi istiqamətində konkret siyasətlər, proqramlar və mexanizmlər hazırlamağa təşviq etmək olduğunu diqqətə çatdırıb.

MEK-in elmi katibi Şəbnəm Rüstəmova qeyd edib ki, tarixən Azərbaycan qadını cəmiyyətdə yüksək və mötəbər mövqe tutub. O, bildirib ki, Ulu Öndər Heydər Əliyevin əsasını qoyduğu dövlət qadın siyasəti Prezident İlham Əliyev tərəfindən ardıcıl və məqsədyönlü şəkildə həyata keçirilir. Mehriban xanım Əliyevanın Azərbaycan Respublikasının Birinci vitse-prezidenti kimi çoxşaxəli fəaliyyəti isə ölkəmizdə qadına göstərilən yüksək ehtiramın və etimadın parlaq nümunəsidir.

Əminə Axundova çıxışında anası — Birinci Qarabağ müharibəsi şəhidi, Milli Qəhrəman Gültəkin Əsgərovanın timsalında Azərbaycan qadınının mərdliyi, vətənə bağlılığı və mənəvi gücündən söz açıb.

Q.Qarayev adına Mərkəzi İncəsənət Məktəbinin direktoru sənətşünaslıq üzrə fəlsəfə doktoru, professor Könül Hüseynova çıxış edərək Azərbaycan musiqi mədəniyyətində qadınların yeri və rolundan, milli, professional musiqmizə gətirdikləri yeniliklərdən, vətənpərvərlik ruhu ilə yoğrulan yaradıcılıq nümunələrindən bəhs edib.

Tədbirdə, həmçinin MEK-in Rəqəmsal kitabxana və süni intellekt şöbəsinin rəhbəri Şəfəq Əliyeva Dünyanın bir çox STEM sahələrində qızların payı hələ də cəmi 35 faiz ikən, Azərbaycanda bu göstərici təxminən 40 faizə çatdığını, bu rəqəmlərin təsadüfi olmadığını, dövlətin yürütdüyü əsaslı siyasətin, “Gender (kişi və qadınların) bərabərliyinin təminatları haqqında” Qanun (2006), “Azərbaycan Respublikasında qadınların rolunun artırılması üzrə Dövlət Proqramı”nın, “Məişət zorakılığının qarşısının alınması haqqında” Qanun (2010) və ictimai dəstəyin nəticəsi olduğunu deyib.

Qadınların elmi fəaliyyətə cəlb olunması Azərbaycanda yüksək səviyyədə olduğunu bildirən MEK-in Nadir fondunun əməkdaşı fil.ü.f.d. Şəlalə Mehyəddinqızı elm, texnologiya, mühəndislik və riyaziyyat sahələrində təhsil alan qızların payının Azərbaycan üçün ümumi göstəricidən yüksək olduğunu deyib. Ali təhsil və doktorantura pillələrində qadınların iştirakının da yüksək olduğunu bildirən çıxışçı magistr pilləsində təhsil alanların 54 faizi, fəlsəfə doktoru təhsili alanların 51 faizi, elmlər doktoru dərəcəsi sahiblərinin isə təxminən 46 faizi qadınların olduğunu diqqətə çatdırıb.

MEK-in əməkdaşı, Gənc Alim və Mütəxəssislər Şurasının sədr müavini Könül Hüseynova  isə Azərbaycan qadınlarının elmdə və cəmiyyətin digər sahələrində artan rolunu vurğulayaraq gənc qızların elmə marağının təşviqinin vacibliyini qeyd edib.