Dünyada ilk dəfə uşaq xərçənginə qarşı peyvəndin sınaqlarına başlanılıb

Avstraliyada ağır uşaq beyin xərçəngi üçün fərdiləşdirilmiş mRNA vaksinləri əsasında ilk klinik sınaq keçiriləcək.

"Azərbaycan müəllimi" xarici KİV-ə istinadən xəbər verir ki, dörd il davam edəcək PaedNEO-VAX adlı tədqiqat çərçivəsində təxminən 70 uşaq fərdi şəkildə hazırlanmış vaksinlə müalicə olunacaq.

Sınaq Avstraliyanın Kvinslend, Yeni Cənubi Uels, Viktoriya, Cənubi Avstraliya və Qərbi Avstraliya ştatlarında yerləşən 8 uşaq xəstəxanasında aparılacaq.

Tədqiqatın elmi rəhbəri Kvinslend Universitetinin (UQ) Freyzer İnstitutunun professoru Brandon Vainrayt bildirib ki, hər bir uşağın şişindən götürülən nümunə genom səviyyəsində analiz ediləcək, yalnız həmin şişə məxsus xərçəng markerləri müəyyənləşdiriləcək və bu markerlərə qarşı xüsusi vaksin hazırlanacaq. Vaksinin hazırlanması təxminən 8-10 həftə çəkəcək.

Uşaqlara iki həftə aralıqlarla 8 doza vaksin, daha sonra isə gücləndirici doza vurulacaq. Müalicənin məqsədi immun sistemini aktivləşdirərək şiş hüceyrələrini tanıyan və məhv edən T-hüceyrələrin yaranmasına nail olmaqdır.

Mütəxəssislər hesab edirlər ki, bu texnologiya gələcəkdə digər xərçəng növlərinin müalicəsində də tətbiq oluna bilər.

Avstraliyada hər il təxminən 40 uşaq beyin xərçəngindən həyatını itirir və ağır formalar üzrə sağ qalma göstəriciləri onilliklərdir ki, dəyişməz qalır.