Hərbi xidmətə çağırılan abituriyent imtahanda necə iştirak edə bilər? - Vacib məqamlar açıqlandı

Fevralın 18-dən 2026/2027-ci tədris ili üçün ali təhsil müəssisələrinin bakalavriat səviyyəsinə və tam orta (11 illik) təhsil bazasında orta ixtisas təhsili müəssisələrinə qəbul imtahanlarına qeydiyyat başlanıb.  Bu proses oğlan abituriyentlərin hərbi qulluqla bağlı məsələlərini də gündəmə gətirib.

Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə iş və beynəlxalq əlaqələr şöbəsinin rəisi Pərviz Sədrəddinov “Azərbaycan müəllimi”nə açıqlamasında bildirib ki, çağırış yaşlı vətəndaşlar - 18 yaşı may ayının 1-dən sonra (may ayının 1-i də daxil olmaqla) tamam olan əvvəlki illərin məzunları, həmçinin 18 yaşı 30.04.2026-cı il tarixədək tamam olan sağlamlıq və ailə vəziyyətinə görə verilmiş möhlətin müddəti 30.07.2026-cı il tarixdən sonra bitdiyi halda ali və orta ixtisas təhsili müəssisələrinə keçiriləcək qəbul imtahanlarında iştirak edə bilərlər: “Abituriyent müddətli həqiqi hərbi xidmətə cəlb edildikdə Dövlət İmtahan Mərkəzinin saytında şəxsi kabinetindən imtahanla bağlı elektron ərizəni çap edərək qeydiyyatda olduğu SHXÇDX-nin struktur qurumuna təqdim etdikdə ona imtahanadək müvəqqəti möhlət veriləcək”.

Şöbə müdiri əlavə edib ki, kişi cinsli vətəndaşların hərbi qeydiyyatı 15 yaşından aparılır: “Hər il 15 yaşı tamam olan kişi cinsli vətəndaşlar yanvar-may ayları ərzində ilkin hərbi qeydiyyata alınmalıdırlar. Respublika orta ümumtəhsil müəssisələrində buraxılış imtahanlarında iştirak etməli olan kişi cinsli vətəndaşlar imtahanlara şəxsiyyət vəsiqəsi ilə buraxılırlar. 15 yaşı tamam olmuş kişi cinsli vətəndaşların şəxsiyyət vəsiqəsi almaları üçün ilkin hərbi qeydiyyata alınmaları zəruridir. 2026-cı ildə 15 yaşı tamam olacaq kişi cinsli vətəndaşların ilkin hərbi qeydiyyata alınması artıq “mygov” platforma üzərindən aparılır. Bunun üçün çağırışaqədərki yaş həddində olan vətəndaşın valideyni və ya hüquqi nümayəndəsi “Xidmətlər” bölməsinə daxil olmalı, “Hərbi” alt bölməsinə keçid etməli, daha sonra “İlkin hərbi qeydiyyat”ı seçməlidir. Açılan yeni pəncərədə “Yeni müraciət”ə daxil olmalı, ekranda görünən cari il üçün 15 yaşı tamam olan övladının ad, soyad və ata adı qeyd olunan xananı seçməlidir. Sonrakı mərhələdə övladının qısa tərcümeyi-halını yazmaq və ya fayl şəklində (pdf və ya şəkil formatında) əlavə etmək, orta təhsilini xarici ölkədə alanlar üçün isə müvafiq arayışı yükləmək, həmçinin mobil nömrəni qeyd etmək lazımdır”.