Nazir: Elmi fəaliyyətdə struktur dəyişikliklərinə ehtiyac var

"Elmin reytinqini dəyərləndirərkən onu düzgün ölçmək vacibdir. Əgər biz bu sahəni inkişaf etdirmək istəyiriksə, ali təhsil müəssisələrinin həm ölkədaxili, həm də beynəlxalq səviyyədə elmi-tədqiqat potensialını gücləndirməliyik. Hazırda ölkəmizdə ali təhsil müəssisələrinin və elmi-tədqiqat mərkəzlərinin sayı kifayət qədər çoxdur, lakin görülən işlərin həcmi nisbətən aşağıdır. Say çox olduqda belə, aparılan tədqiqatların effektivliyi və keyfiyyəti ilə bağlı problemlər meydana çıxır”.

“Azərbaycan müəllimi” xəbər verir ki, bunu elm və təhsil naziri Emin Əmrullayev bu gün Elm və Ali Təhsilin Beynəlmiləlləşməsi Forumunda deyib.

O bildirib ki, bu mənada ali təhsil müəssisələri ilə elmi-tədqiqat qurumlarının birgə fəaliyyətini təşkil etməyə ciddi ehtiyac var. Bu əməkdaşlıq sistemli şəkildə həyata keçirilməlidir ki, ayrı-ayrı sahələrdə, fərqli təşəbbüslərdə emosional yanaşmaların deyil, ölkənin elmi potensialının güclənməsinin prioritet olması təmin edilsin:

“Bizim üçün sevindirici məqam ondan ibarətdir ki, son illərdə elmi fəaliyyətin bəzi göstəricilərində dinamika müşahidə olunur. Məsələn, beynəlxalq səviyyəli elmi jurnallarda nəşr olunan məqalələrin sayının artması, ölkədə elmi məhsuldarlığın və potensialın olduğunu sübut edir. Bununla belə, bu nəticələrin daha yüksək səviyyəyə çatdırılması üçün müəyyən struktur dəyişikliklərinə və idarəetmə modellərinin yenilənməsinə ehtiyac var”.

Nazir əlavə edib ki, daxili elmi qurumlar arasında əməkdaşlıq artırılmalı, yeni və səmərəli əməkdaşlıq modelləri tətbiq edilməlidir. Bu yanaşma sayəsində həm keyfiyyətli elmi tədqiqatların sayı artacaq, həm də Azərbaycan elmi beynəlxalq reytinqlərdə layiqli yerini tutacaqdır”.