Kənd məktəbindən innovasiya nümunəsi: Masallıda startap ruhu

Lənkəran–Astara Regional Təhsil İdarəsinin tabeliyində fəaliyyət göstərən Masallı rayonu üzrə təhsil sektorunun təşəbbüsü ilə fevral ayında Masallıda “Startap və İnnovasiya ayı” təşkil olunub. Layihə çərçivəsində rayon məktəblərində bir sıra maraqlı və innovativ təşəbbüslər həyata keçirilib.

“Azərbaycan müəllimi” xəbər verir ki, bu innovativ dalğanın ünvanlarından biri də Masallı rayonu Elşad Ağayev adına Hişkədərə kənd tam orta ümumtəhsil məktəbidir. Burada şagirdlər fevral ayı ərzində yalnız dərslərlə kifayətlənməyib, müxtəlif layihələr hazırlayıb, problemləri müəyyənləşdirib və onların həlli yollarını araşdırıblar.

Layihələrin mentorları coğrafiya müəllimi Əlizamin Məmmədəliyev və uşaq birliyi rəhbəri Aynur Kişiyevadır. Onlar ideyaların formalaşdırılması, planlaşdırma, texniki icra və təqdimat mərhələlərində şagirdlərə istiqamət veriblər. Mentorluq prosesi sadəcə nəzarət funksiyası daşımır; əsas məqsəd şagirdlərin yaradıcılıq və problem həlletmə bacarıqlarını inkişaf etdirməkdir.

“Startap və İnnovasiya ayı” çərçivəsində məktəbdə dörd əsas layihə həyata keçirilib: "Ekofleym2 (Ecoflame), "Seyfhör" (Safeher), "Eyrnova" (Airnova) və "Kalori-X". Layihələr əsasən 8–9-cu sinif şagirdləri tərəfindən hazırlanıb və hər biri konkret sosial və ya texnoloji problemin həllinə yönəlib.

"Ekofleym" ekoloji çirklənmə və tullantıların azaldılması məsələsinə diqqət yetirir.
"Seyfhör" şəxsi təhlükəsizlik və əşyaların qorunması problemini hədəfləyir.
"Eyrnova" hava keyfiyyətinin monitorinqi və yaxşılaşdırılması istiqamətində təkliflər təqdim edir.
"Kalori-X" isə düzgün qidalanma və sağlam həyat tərzi ilə bağlı çətinliklərin aradan qaldırılmasına fokuslanır.

Göründüyü kimi, layihələrin hər biri real həyatla birbaşa əlaqəlidir və şagirdlər gündəlik qarşılaşdıqları problemlərə innovativ yanaşma nümayiş etdirirlər.

Məktəbdə maket şəklində təqdim olunan layihələr üzrə komandalar şagirdlərin maraq və bacarıqları nəzərə alınmaqla formalaşdırılıb. Hər bir şagird özünü daha çox inkişaf etdirə biləcəyi sahəni seçib. Bu yanaşma həm motivasiyanı artırıb, həm də işin səmərəliliyini yüksəldib.

Əlizamin Məmmədəliyevin sözlərinə görə, şagirdlərdə təşəbbüskarlıq, yaradıcılıq, komanda işi bacarığı və məsuliyyət hissi xüsusilə diqqət çəkir. İdeyanı real məhsula çevirmək üçün kritik düşüncə və texniki biliklərdən istifadə bacarığı isə bu prosesin ən dəyərli nəticələrindəndir: “Şagirdlərə ideyanı məhsula və ya təqdimata çevirmək üçün mərhələli dəstək göstəririk. İdeyanın formalaşdırılmasından başlayaraq prototiplərin hazırlanması, təcrübələrin aparılması və nəticələrin təqdimata çevrilməsi prosesində onları istiqamətləndiririk. Eyni zamanda, təqdimat bacarıqları, vizual və texniki elementlərin düzgün istifadəsi ilə bağlı məsləhətlər veririk ki, layihə həm praktik, həm də estetik baxımdan uğurlu alınsın”.

Mentor əlavə edib ki, bu təşəbbüs məktəbdə startap mədəniyyətinin formalaşmasına mühüm töhfə verir: “Şagirdlər risk etməyi, yeni ideyaları sınaqdan keçirməyi və komanda daxilində effektiv əməkdaşlıq etməyi öyrənirlər. Bu mühit onları gələcəkdə innovativ düşüncəyə və texnoloji həllərə daha hazırlıqlı edir. Layihələrin davamlılığı da nəzərdə tutulur. Növbəti mərhələdə daha çox sinif və məktəbdən şagirdlərin cəlb olunması, prototiplərin real bazar və sosial mühitdə sınaqdan keçirilməsi planlaşdırılır. Məqsəd ideyanı yalnız kağız üzərində deyil, real həyatda tətbiq oluna bilən məhsula çevirməkdir”.

“Startap və İnnovasiya ayı” çərçivəsində həyata keçirilən bu təşəbbüslər göstərir ki, kənd məktəbində də böyük ideyalar yarana bilər. Hişkədərə məktəbində formalaşan innovativ mühit şagirdlərin gələcək təhsil və peşə seçimində daha inamlı addımlar atmasına zəmin yaradır.

Çünki burada şagirdlər təkcə öyrənmir, həm də ideyalarını reallaşdırmağı bacarırlar.