Qəbələdə “Coşqunun zəfər yolu” kitabının təqdimatı keçirilib

Qəbələ Dövlət Peşə Təhsil Mərkəzində Şəhid Coşqun Bayramovun əziz xatirəsinə həsr olunmuş “Coşqunun zəfər yolu” adlı kitabın təqdimat mərasimi keçirilib.

"Azərbaycan müəllimi" xəbər verir ki, tədbir Azərbaycan Respublikasının Dövlət Himninin səsləndirilməsi ilə başlanıb. Ardınca Vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

“Coşqunun zəfər yolu” kitabının müəllifləri Mirhəsən Ağayev və Cəlil Xeyirbəydir. Əsərdə Şəhid Coşqun Bayramovun həyat və döyüş yolu, Vətənə sədaqəti, cəsarəti və ailəsinə bağlılığı geniş şəkildə işıqlandırılıb.

Təqdimat mərasimində şəhidin valideynləri və ailə üzvləri, Qəbələ rayonunun şəhid ailələri, ziyalılar, ictimaiyyət nümayəndələri, eləcə də mərkəzin mühəndis-pedaqoji heyəti və tələbələri iştirak ediblər.

Çıxış edənlər bildiriblər ki, şəhidlərimizin qəhrəmanlıq salnaməsinin gələcək nəsillərə çatdırılması hər birimizin müqəddəs borcudur. Qeyd olunub ki, “Coşqunun zəfər yolu” kitabı gənclərin vətənpərvərlik ruhunda formalaşmasında, milli dəyərlərə bağlılığının möhkəmlənməsində mühüm rol oynayacaq.

Şəhidin valideynləri çıxış edərək tədbirin təşkilatçılarına və kitab müəlliflərinə minnətdarlıqlarını ifadə ediblər. Onlar oğullarının Vətən uğrunda göstərdiyi şücaətlə qürur duyduqlarını vurğulayaraq, belə layihələrin şəhidlərin adının daim uca tutulmasına xidmət etdiyini bildiriblər.

Kitabın müəllifləri Mirhəsən Ağayev və Cəlil Xeyirbəy çıxış edərək əsərin ərsəyə gəlmə mərhələsindən danışıblar. Onlar qeyd ediblər ki, kitabda Coşqun Bayramovun həyatının müxtəlif məqamlarına, döyüş yoldaşlarının xatirələrinə və onun Vətən sevgisini əks etdirən faktlara yer verilib. Müəlliflər bu nəşrin gənc nəsil üçün örnək və motivasiya mənbəyi olacağına inandıqlarını ifadə ediblər.

Tədbir çərçivəsində Şəhid Coşqun Bayramovun həyat və döyüş yoluna həsr olunmuş videoçarx nümayiş etdirilib. Videoçarx iştirakçılar tərəfindən dərin ehtiram və duyğusal anlarla qarşılanıb.

Sonda “Coşqunun zəfər yolu” kitabı iştirakçılara təqdim olunub, xatirə şəkilləri çəkdirilib.

Bu kimi tədbirlər gənclərdə vətənə məhəbbət hissinin daha da gücləndirilməsi, şəhidlərimizin xatirəsinin əbədiləşdirilməsi və milli-mənəvi dəyərlərimizin təbliği baxımından xüsusi əhəmiyyət kəsb edir