Şagirdlər etiraf edirlər ki, telefon olmayanda dərsi daha yaxşı başa düşürlər – Ekspert

“Müəllim nə qədər maraqlı dərs keçsə də, telefonlar uşaqların diqqətini tamamilə dağıdır. Hətta bəzən şagirdlər gizlicə bir-birlərinə mesaj yazır, dərsdə çəkilmiş şəkilləri paylaşırlar. Təbii ki, bu da  təlim prosesini pozur”.

Bunu “Azərbaycan müəllimi”nə deyən Elm və Təhsil Nazirliyi yanında İctimai Şuranın katibi Günay Əkbərova bildirib ki, “Şagird davranış qaydaları”na əsasən, telefon və digər ağıllı cihazlardan istifadənin qadağan olunması çox vacib və zamanında verilmiş qərardır. Çünki müasir dövrdə mobil telefonlar artıq ciddi problemə çevrilib: 

“Uşaqlarımızın təhlükəsizliyi bir valideyn olaraq, bizim üçün çox önəmlidir. Hər bir valideyn övladı ilə əlaqə saxlamaq istəyir. Amma şagirdlər mobil cihazlardan istifadə edərkən bir çox nüanslara diqqət yetirməlidirlər. Məktəb rəhbərliyi telefonu təhlükəsiz yerdə saxlasa və dərsdən sonra uşağa qaytarsa, həm valideynlər rahat olar, həm də dərs prosesi pozulmaz. Bu məsələdə valideynlərin də narahat olduğu məqamlar var. Onlar düşünürlər ki, bu proses uşaqların texnoloji inkişafdan geri qalmasına səbəb ola bilər. Təbii ki, bu, belə deyil. Əgər hər hansı bir dərsdə texnologiyadan istifadə lazımdırsa, müəllim bunu əvvəlcədən planlaşdırır və valideynləri bununla bağlı məlumatlandırır. Bu zaman cihazlardan nəzarətli şəkildə, konkret təlim məqsədləri üçün istifadə olunur”.

G.Əkbərovanın sözlərinə görə, beynəlxalq təcrübədə də məktəblərdə şagirdlərin mobil cihazlardan istifadəsi ilə bağlı məhdudiyyətlər tətbiq olunur:

“Finlandiya, Sinqapurda da oxşar qaydalar var. Çünki telefon asılılığı artıq qlobal problemə çevrilib. Bu aludəçilik uşaqları real ünsiyyətdən uzaqlaşdırır, sosial bacarıqlarını zəiflədir. Dərs zamanı telefona baxmaq vərdişi yaranır ki, bu da gələcəkdə onların iş həyatlarına mənfi təsir göstərə bilər". 

O əlavə olaraq qeyd edib ki, bu qaydanın tətbiqindən sonra müəllimlər arasında müsbət fikirlər formalaşıb: “Onlar bildirirlər ki, şagirdlər dərsə daha çox fokuslanır, sinif diskussiyalarında daha fəal iştirak edirlər. Bəzi şagirdlər hətta etiraf edirlər ki, telefon olmayanda dərsi daha yaxşı başa düşmək olur. Təbii ki, bu qaydanın uğurlu tətbiqi üçün əsas məsələ məktəb-valideyn əməkdaşlığıdır. Biz valideynlərlə mütəmadi görüşlər keçirir, onların narahatlıqlarını dinləyir və birgə həll yolları tapırıq. Çünki son məqsədimiz uşaqlarımızın daha yaxşı təhsil alması, hərtərəfli inkişafıdır”.