Kuboklar, medallar və rekordlar – Naxçıvanın çempionları

Azərbaycanda martın 5-i sağlam bədən, möhkəm iradə və yenilməz əzmin bayramıdır. Bu gün ölkəmizdə Bədən Tərbiyəsi və İdman Günü kimi qeyd olunur.  Bu əlamətdar gün İlham Əliyevin 2005-ci il 4 mart tarixli Sərəncamına əsasən təsis edilib.

Ölkəmizdə Bədən Tərbiyəsi və İdman Gününün məhz martın 5-də qeyd olunması isə təsadüfi deyil. 1995-ci il martın 5-də Ulu Öndər Heydər Əliyev Bakı İdman Sarayında dünya və Avropa çempionatlarının qalibləri və mükafatçıları ilə görüşüb, İdman Fondunu təsis edib, bədən tərbiyəsi və idmanın inkişafında yeni strategiyanın təməlini qoyub.

Bu gün ölkəmizdə idmana, bədən tərbiyəsinə diqqət ildən-ilə daha da artır.  Bu inkişafın canlı nümunələrini isə bölgələrdə, xüsusilə də Naxçıvanda görmək mümkündür. Naxçıvan Dövlət Peşə Təhsil Mərkəzinin tələbələri arasında idmana böyük maraq göstərən, müxtəlif yarışlarda uğur qazanan gənclər az deyil.

“Azərbaycan müəllimi” peşə məktəbinə yolunu salıb və tələbələrlə söhbətləşib.

Uşaqlıq həvəsindən çempionluğa – Ayşən Məmmədovanın yolu

Mərkəzin “Mehmanxana və restoran işinin təşkili və idarə edilməsi” ixtisasının 2-ci kurs tələbəsi Ayşən Məmmədova 7 yaşından idmanla məşğuldur. O, əvvəlcə gimnastikaya başlayıb. 4-5 il bu idman növü ilə məşğul olduqdan sonra 3 il karateyə gedib, daha sonra idman karyerasını 1 il atletika ilə davam etdirib. 10-cu sinifdə isə voleybola başlayıb.

Ayşən Naxçıvan şəhər 11 nömrəli məktəbin voleybol qrupu ilə bir çox yarışlarda iştirak edərək kuboklar qazanıb. 2024-cü ildə Muxtar Respublika üzrə birincilik əldə edib, Ulu Öndər Heydər Əliyevin 100 illiyi ilə bağlı keçirilən yarışda  komanda olaraq 2-ci yerə layiq görülüblər.

O deyir ki, gimnastikaya balaca yaşlarından böyük həvəs göstərib, evdə məşğul olub: “Atam dedi ki, professional şəkildə öyrən. İlk vaxtlarda çətinlik çəkmədim, zamanla daha yaxşı oldu. Bakıda yarışlara getdim, birincilik qazandım. Sonra yaş artıqca hiss etdim ki, bu idmandan uzaqlaşmalıyam, artıq hədəfimdə o deyildi”.

Karateyə başlayıb, bir çox yarışlarda iştirak edib. Pandemiya dövründə məşqlər dayansa da, o, evdə məşqlərini davam etdirib. Daha sonra qaçışa başlayaraq atletika ilə məşğul olub və nəhayət, özünü voleybolda tapıb. Hazırda da bu idman növü ilə məşğuldur.

Ailəsinin də idmana bağlı olduğunu deyən Ayşən bildirir ki, atası basketbolçu və güləşçi olub, qardaşı basketbol müəllimidir, bacısı boksla məşğuldur, anası da əvvəllər idmançı olub: “Ailəmdə hamı idmanla məşğul olsa da, ilk başda mən də çox çəkinirdim, utanırdım toplum içinə çıxmağa, deyirdim hər kəs mənə baxır. Əksinə, ora çıxdıqdan sonra oyun o qədər maraqlı keçir ki, səhnədə olanda kimlərinsə orada olduğunu unudursan. İdman sosiallaşdırır, çevrəni genişləndirir, yarışlarda yeni dostlar, insanlar tanıyırsan”.

Cüdo ilə sağlam həyata – Rəsul Hüseynov

Mərkəzin “Nəqliyyat vasitələrinin texniki istismarı (avtomobil üzrə)” ixtisas qrupunun 2-ci kurs tələbəsi Rəsul Hüseynov isə cüdonu seçib. Canlı yarışlara baxaraq bu idman növünə maraq göstərib.

Rəsul deyir ki, Culfada Elnur və Hafiz müəllim ona böyük dəstək olublar: “Onlar məni idmana və sağlam yola çəkdilər. Ailəm də mənə dəstək olub”.

2018-ci ildən cüdoya başlayan Rəsul 2019-cu ildən yarışlara qatılıb, Muxtar Respublika üzrə bir çox yarışlarda yer tutub. Hazırda dərslərlə üst-üstə düşdüyü üçün məşqlərə fasilə versə də, gələcəkdə davam etdirmək niyyətindədir: “İdman zərərli vərdişlərdən uzaq durmağa, sağlamlığı qorumağa kömək edir”.

Rəsulun gələcək arzusu isə mərkəzi bitirdikdən sonra universitetdə təhsil almaq və polis olmaqdır.

Kikboksinq ailəsi – İsa və Sənanın uğurları

“Mühasibat uçotu” ixtisası üzrə 2-ci kurs tələbəsi İsa Yaqubov idmana çox erkən yaşda - 3 yaşdan başlayıb. Atası kikboksinq müəllimi olduğu üçün onu da bu sahəyə yönləndirib. “Evdə də məşqlər davam edir”, - deyir.

O, atasının – baş məşqçi İsa Yaqubovun rəhbərlik etdiyi “Naxçıvan” Kikboksinq Klubunun üzvüdür. Muxtar Respublika üzrə yarışların çoxunda qızıl medallar qazanıb, 15-dən artıq medalı var.

İsa deyir ki, ailəsində idman ənənəsi güclüdür: “Qardaşım, əmilərim, əmioğlularım hamısı idman müəllimidir. Gənclərə tövsiyəm odur ki, zərərli vərdişlərdən uzaq olsunlar, idmanla məşğul olsunlar. İdmana getdikcə alışırsan, qorxu qalmır”.

Onun da gələcək planları arasında universitetdə təhsil almaq var.
Mərkəzin “Elektronika və kommunikasiya sistemlərinin istismarı” ixtisası üzrə 2-ci kurs tələbəsi Sənan Zeynalov da “Naxçıvan” Kikboksinq Klubunun üzvüdür və İsa ilə qohumdur. O, 2017-ci ildən kikboksinqlə məşğuldur. 2018-ci ildə “Heydər Əliyev Kuboku” uğrunda kikboksinq üzrə Muxtar Respublikada kubok qazanıb.

Sənan seçdiyi ixtisasdan da məmnundur: “Buranı seçməkdən peşman deyiləm. Sahəm maraqlıdır, marağım və həvəsim çoxdur”.
O da gələcəkdə təhsilini davam etdirmək istəyir.

Futbol sevgisi ilə başlayan yol – Amil Süleymanov

“Binaların tikintisi və istismarı” ixtisas qrupunun 2-ci kurs tələbəsi Amil Süleymanov isə 2018-ci ildən futbola başlayıb. Televiziyada Real Madrid CF komandasının oyunlarını izləməsi onu futbola həvəsləndirib. Sonradan futbola yazılıb və “Araz-Naxçıvan” PFK komandasının üzvü olub. 2021-ci ildə Bakıda keçirilən yarışlarda iştirak edib.

Atası və əmisi güləşçi olsa da, Amil bir dəfə güləşə gedib, marağı olmadığı üçün futbola yönəlib: “Məqsədlərim çoxdur. Təhsilimi davam etdirib universiteti bitirmək və polis olmaq istəyirəm”.

İdman sahəsində fəal olan tələbələr

5 Mart – Bədən Tərbiyəsi və İdman Günü təkcə rəsmi bayram deyil, həm də sağlam həyat tərzinin, əzmin, iradənin və uğurun təntənəsidir. Naxçıvanda, xüsusilə Naxçıvan Dövlət Peşə Təhsil Mərkəzində təhsil alan gənclər üçün idman sadəcə məşğuliyyət deyil, həyat tərzidir. Onların hər birinin öz hekayəsi, öz mübarizəsi və öz qələbəsi var.

Belə ki, müxtəlif ixtisaslarda oxuyan gənclər eyni zamanda fərqli idman növləri ilə də məşğul olaraq aktiv həyat tərzi nümayiş etdirirlər.

“Elektronika və kommunikasiya sistemlərinin istismarı” ixtisası üzrə təhsil alan Rəhman Məmmədov şahmat və boks idman növləri ilə məşğul olur. “Dərzi” ixtisasında oxuyan Miryusif Seyidov güləşlə maraqlanır.

“Geniş profilli traktorçu-maşinist, təmirçi çilingər, avtomobil sürücüsü” ixtisası üzrə təhsil alan Səfərov Nail boks, Abbasov Mehrac isə voleybol idman növü ilə məşğuldur.

“Baytarlıq və heyvandarlıq işi” ixtisasında oxuyan Məhəmməd Abbasov da idmançı tələbələr sırasında yer alır. “Turizm sahəsində iaşə üzrə mütəxəssis” ixtisasının tələbəsi Nizami Həsənov kikboksla məşğul olur.

“Avtomobillərin təmiri-çilingəri, avtomobil sürücüsü” ixtisası üzrə Əli Dünyamalıyev şahmat, Hüseyn Allahverdiyev güləş, Qalib Seyidov cüdo, Orxan Məmmədov isə voleybol və güləşlə məşğuldur.

“Dəmiryol stansiya və keçid növbətçisi” ixtisasının tələbəsi Sinan Hüseynov şahmatla maraqlanır.

“Kombi və kondisioner ustası” ixtisası üzrə Cəbrayıl Əhmədov güləş, Sadiq Hüseynov və Murtuz Əhmədov kikboks, Orxan Nağıyev voleybol, Adəm Məmiyev isə atletika (qaçış) ilə məşğuldur.

“Nəqliyyat vasitələrinin texniki istismarı” ixtisası üzrə Aslanov Toğrul kikboks, cüdo idman növündə, “Kənd təsərrüfatı və inşaat texnikası (maşınlarının) istismarı” ixtisası üzrə Sübhan Əhmədli boks, İbrahim İsmayılzadə isə üzgüçülük idman növü ilə məşğuldur.

Beləliklə, müxtəlif peşə istiqamətləri üzrə təhsil alan tələbələr yalnız nəzəri və praktiki biliklərlə kifayətlənməyərək, eyni zamanda idman sahəsində də fəallıq göstərir, sağlam həyat tərzinin təbliğinə töhfə verirlər.

İdman zalında başlayan arzular bəzən voleybol meydançasına, bəzən cüdoya, bəzən də futbol stadionuna uzanır. Amma məqsəd birdir – güclü olmaq, sağlam qalmaq və gələcəyə inamla addımlamaq.