Kollecdə “Gələcəyin kodu” adlı təlim keçirilib

Lənkəran Dövlət Universitetinin nəzdində fəaliyyət göstərən Sosial və Aqrar-Texnoloji Kollecdə təlimçi Leyla Qarazadə tərəfindən “Gələcəyin kodu” mövzusunda təlim keçirilib.

"Azərbaycan müəllimi"nə Kollecdən verilən məlumata görə, təlimin keçirilməsində məqsəd tələbələrdə informasiya texnologiyalarına marağın artırılması, proqramlaşdırma sahəsində bilik və bacarıqların inkişaf etdirilməsi, eləcə də rəqəmsal transformasiya dövründə gənclərin düzgün istiqamətləndirilməsidir.

Bildirilib ki, təlimçi Leyla Qarazadə  müasir dövrdə texnologiyanın həyatımızın bütün sahələrinə nüfuz etməsi, süni intellekt texnologiyalarının inkişaf perspektivləri, kibertəhlükəsizliyin müasir çağırışları, mobil tətbiqlərin hazırlanma mərhələləri və veb texnologiyaların tətbiq sahələri barədə ətraflı məlumat verib. O, proqramlaşdırmanın artıq yalnız İT mütəxəssisləri üçün deyil, iqtisadiyyat, idarəetmə, aqrar sahə, təhsil və digər istiqamətlər üzrə də vacib bacarıqlardan birinə çevrildiyini, rəqəmsal bacarıqlara yiyələnən gənclərin əmək bazarında daha çevik və rəqabətqabiliyyətli olduğunu vurğulayıb.

Təlimdə həmçinin  proqramlaşdırma dillərinin seçimi, layihə əsaslı öyrənmə metodları, startap ideyalarının formalaşdırılması və rəqəmsal sahibkarlıq imkanları haqqında təqdimatlar nümayiş etdirilib. Tələbələr real nümunələr üzərindən texnoloji həllərin gündəlik həyatdakı rolunu daha yaxından anlama imkanı əldə ediblər.                                                                                                                                         
Sual-cavab sessiyasında iştirakçıları maraqlandıran məsələlər ətraflı şəkildə izah edilib, gələcək karyera planlaması ilə bağlı tövsiyələr verilib.    
                               
Qeyd edək ki, tədbir iştirakçıları tərəfindən böyük maraq və rəğbətlə qarşılanan təlim gənclərin informasiya texnologiyalarına baxışının genişləndirilməsində, eləcə də intellektual və peşəkar inkişafa töhfə vermək baxımından xüsusi əhəmiyyət daşıyır.