STK-nın tələbələri Təhsil Muzeyinə ekskursiya ediblər

Martın 4-də ADNSU-nun nəzdində Sənaye və Texnologiya Kollecinin “Könüllülük və Sosial İnkişaf” klubunun üzvü olan tələbələr Azərbaycanın Təhsil Muzeyinə ekskursiya ediblər.

"Azərbaycan müəllimi" xəbər verir ki, ekskursiya kollecin Azərbaycan dili və ədəbiyyat müəllimi, “Könüllülük və Sosial İnkişaf” klubunun kuratoru Pərvanə Məmmədovanın təşəbbüsü və təşkilatçılığı ilə həyata keçirilib.

Tədbirin əsas məqsədi tələbələri Azərbaycanın təhsil tarixinin formalaşma və inkişaf mərhələləri, maarifçilik hərəkatının rolu, eləcə də görkəmli pedaqoqların zəngin irsi ilə yaxından tanış etmək olub. Klubun üzvü olan tələbələr muzeyin ekspozisiya zalları ilə yaxından tanış olaraq, qədim dərsliklər, arxiv sənədləri, fotomateriallar və müxtəlif dövrləri əks etdirən tarixi eksponatlar barədə muzeyin əməkdaşları tərəfindən ətraflı məlumat əldə ediblər. Ekskursiya zamanı verilən məlumatlar tələbələr tərəfindən böyük maraqla qarşılanıb, onların fəal iştirakı və ünvanladıqları suallar tədbirin interaktiv və səmərəli keçməsinə şərait yaradıb. Bu kimi maarifləndirici ekskursiyalar tələbələrin dünyagörüşünün genişlənməsinə, milli-mənəvi dəyərlərə bağlılığının möhkəmlənməsinə və sosial fəallığının artırılmasına möhüm töhfə verir.