Türkiyə əcnəbi tələbə sayını 500 minə çatdıracaq

Türkiyə əcnəbi tələbə sayını 500 minə çatdıracaq 

Türkiyə yaxın illərdə xaricdən tələbə sayını artırmaq niyyətindədir.

“Azərbaycan müəllimi” xəbər verir ki, bu barədə Türkiyə Ali Təhsil Şurasının sədri Erol Özvar “2024-2028-ci illər üzrə Ali Təhsildə Beynəlmiləlləşmə Strategiya Sənədi” ilə bağlı mətbuata açıqlamasında bildirib. 

Ali Təhsil Şurasının sədri qeyd edib ki, Türkiyədə əcnəbi tələbələrin qlobal payı 6,25%-ə çatdırılacaq. Akademiklər xaricdəki tədqiqat təqaüd proqramları vasitəsilə doktorantura və postdoktorantura dərəcələri üçün xaricdəki seçilmiş universitetlərdə və tədqiqat mərkəzlərində işləməyə təşviq ediləcəklər. Onun sözlərinə görə, hazırda Türkiyə 350 min beynəlxalq tələbə ilə dünyanın ən çox beynəlxalq tələbəsi olan 8-ci ölkəsidir. Türkiyədəki beynəlxalq tələbələrin ümumi tələbə sayındakı payı 7,49% təşkil edir ki, bu da OECD orta göstəricisi olan 6,62 faizdən çoxdur. İxtisaslı beynəlxalq tələbələri ali təhsil sisteminə cəlb etmək üçün beynəlxalq tələbələrin universitetlərə qəbulunda “YÖS”ün beynəlxalq səviyyədə tanınan bir imtahan olması hədəflənir.