ADPU-da “Gələcəyin arxitekturası: Şəxsi və peşəkar inkişafın dizaynı” adlı təlim keçirilib

Azərbaycan Dövlət Pedaqoji Universitetində (ADPU) ABŞ-də fəaliyyət göstərən “Chartered Culture and Education Institute”un (CCEI) təsisçisi və İdarə Heyətinin sədri, mədəni diplomatiya, qlobal idarəetmə və institusional inkişaf sahəsində beynəlxalq səviyyədə tanınan mütəxəssis Vasif Eyvazzadənin magistrantlar üçün “Gələcəyin arxitekturası: Şəxsi və peşəkar inkişafın dizaynı” mövzusunda təlimi təşkil olunub.

ADPU-dan "Azərbaycan müəllimi"nə verilən məlumata görə, təlimdən əvvəl Vasif Eyvazzadə ilə ADPU-nun Təhsil menecmenti kafedrasında görüş keçirilib. Görüşdə universitetin tədris işləri üzrə prorektoru dosent Eldar Aslanov, kafedranın müdiri dosent İsrayıl İsgəndərov və əməkdaşlar iştirak ediblər. Görüş zamanı ali təhsilin idarə olunmasında müasir yanaşmalar, liderlik və təşkilati inkişaf, eləcə də mədəni və təhsilyönümlü beynəlxalq təşəbbüslər kontekstində qarşılıqlı əməkdaşlıq imkanları ətrafında geniş fikir mübadiləsi aparılıb.

Daha sonra baş tutan təlimdə ADPU-nun elm və innovasiyalar üzrə prorektoru professor Asəf Zamanov, Təhsil menecmenti kafedrasının müdiri dosent İsrayıl İsgəndərov, akademik heyət üzvləri və magistrantlar iştirak ediblər. Təlim zamanı Vasif Eyvazzadə müasir dövrdə qlobal dəyişikliklər fonunda insan kapitalının inkişafı, şəxsi və peşəkar potensialın strateji planlaşdırılması, liderlik bacarıqlarının formalaşdırılması, innovativ düşüncə tərzi, ömürboyu öyrənmə və karyera inkişafının dizaynı mövzularında ətraflı təqdimatla çıxış edib.

Təlim interaktiv formatda təşkil olunub, iştirakçıların sualları cavablandırılıb, müzakirələr aparılıb və beynəlxalq akademik və peşəkar təcrübədən praktiki nümunələr təqdim olunub. Magistrantlar bu cür maarifləndirici və tətbiqyönümlü təlimlərin onların gələcək peşəkar fəaliyyətlərinə və fərdi inkişaf strategiyalarının formalaşmasına mühüm töhfə verdiyini vurğulayıblar.

Qeyd edək ki, Vasif Eyvazzadə dövlət idarəçiliyi, akademiya və qeyri-kommersiya sektorunda 20 ildən artıq fəaliyyət göstərən, mədəni diplomatiya, institusional inkişaf və qlobal tərəfdaşlıqlar sahəsində beynəlxalq səviyyədə tanınan mütəxəssisdir. Uzun illər Azərbaycanda da müxtəlif vəzifələrdə çalışan V. Eyvazzadə həmçinin “Bakı Prosesi” və Mədəniyyətlərarası Dialoq üzrə Dünya Forumu kimi BMT-dəstəklı qlobal platformaların katibi olmuşdur. O, UNESCO-nun 43-cü Dünya İrsi Komitəsinin Əməliyyat Komitəsinə sədrlik etmiş, 2016–2021-ci illərdə ICESCO üzrə Azərbaycan Milli Komissiyasının rəhbəri qismində fəaliyyət göstərmişdir. Hazırda ABŞ-də fəaliyyət göstərən “Chartered Culture and Education Institute”-un (CCEI) təsisçisi, İcraçı Direktoru və İdarə Heyətinin sədridir. Onun rəhbərliyi ilə CCEI qlobal mədəniyyət, təhsil, irs, liderlik və dövlət idarəçiliyi sahələrində peşəkar standartların yüksəldilməsi üçün yenilikçi təşəbbüslər həyata keçirir. Bu təşəbbüslərə dünyada ilk dəfə mədəni müəssisələri, mədəni irs ekosistemlərini və təhsil, biznes və dövlət sektorlarında mədəni savadlılıq səviyyəsini qiymətləndirən Dünya Mədəniyyət İndeksi, eləcə də Dövlət İdarəçiliyində Mükəmməllik Laboratoriyası, Mədəniyyət və Təhsil Qiymətləndirmə Mərkəzi, Elm və Texnologiya Diplomatiyası Mərkəzi və Həyat Dizaynı Laboratoriyası kimi qabaqcıl proqramlar daxildir.