İmtahanların çətin və ya asan olması qəbul planına təsir etmir - Nazir

“Qərarların qəbul edilməsi və təhlillərin aparılması məqsədilə bir sıra mühüm dəyişikliklər həyata keçirilib. Bu dəyişikliklər yalnız qurumun strukturunu deyil, eyni zamanda imtahanların məzmununu da əhatə edib”.

“Azərbaycan müəllimi” xəbər verir ki, bu fikirləri bu gün elm və təhsil naziri Emin Əmrullayev Dövlət İmtahan Mərkəzinin 10 illik yubileyinə həsr olunmuş beynəlxalq elmi-praktik konfransda çıxışı zamanı səsləndirib.

O qeyd edib ki, buraxılış imtahanlarında xarici dil fənninin məcburi fənn kimi tətbiqi, açıq tipli sualların ilk dəfə istifadəsi, eləcə də abituriyentlərə imtahanlarda iki dəfə iştirak imkanı yaradılması bu yeniliklərin sırasındadır.

Nazir qeyd edib ki, təhsil sahəsində dəyişikliklərin ən təsirli mexanizmlərindən biri məhz imtahan sistemidir. Onun sözlərinə görə, bəzən bir səhifəlik imtahan materialı yüzlərlə səhifəlik dərslik və ya sənədlərdən daha güclü təsir imkanına malik olur.

Gələcək istiqamətləri də konfrans çərçivəsində geniş müzakirə olunacağını deyən nazir həmçinin cəmiyyətdə imtahanlarla bağlı aparılan müzakirələrin bəzən düzgün istiqamətdə olmadığını diqqətə çatdırıb. Xüsusilə imtahanların çətinliyi ilə bağlı fikirlərə münasibət bildirən nazir qeyd edib ki, imtahanların çətin və ya asan olması qəbul planına təsir etmir. Belə ki, ali təhsil müəssisələrinə hər halda eyni sayda tələbə qəbul olunur.

Nazir əlavə edib ki, istənilən halda daha hazırlıqlı və bilikli abituriyentlər digərlərinə nisbətən daha geniş seçim imkanları əldə edir və bu da ədalət prinsipinin qorunduğunu göstərir. O, həmçinin vurğulayıb ki, sualların çətinliyi və ya asanlığı bütün iştirakçılar üçün eyni olduğundan bu amil ümumi nəticələrə prinsipial təsir göstərmir.