Emin Əmrullayev: PISA-nın nəticələri islahatların təsirinin qiymətləndirilməsində mühüm göstərici olacaq  

İmtahan məzmununun təkmilləşdirilməsi təhsilin keyfiyyətinə təsir edən ən effektiv vasitələrdən biridir. Bu baxımdan beynəlxalq qiymətləndirmə proqramları, xüsusilə PISA nəticələri xüsusi əhəmiyyət daşıyır.

“Azərbaycan müəllimi” xəbər verir ki, bu fikirləri bu gün elm və təhsil naziri Emin Əmrullayev Dövlət İmtahan Mərkəzinin 10 illik yubileyinə həsr olunmuş beynəlxalq elmi-praktik konfransda çıxışı zamanı səsləndirib.

O qeyd edib ki, cari ildə açıqlanacaq nəticələr son illərdə aparılan islahatların təsirini qiymətləndirmək baxımından mühüm göstərici olacaq: “Təhsil sahəsində həyata keçirilən dəyişikliklərin nəticələri uzun müddət sonra özünü göstərir. Məsələn, məktəbəqədər hazırlıq islahatlarının nəticələri yalnız illər sonra beynəlxalq qiymətləndirmələrdə əksini tapacaq”.

Emin Əmrullayev oxuyub-anlama bacarıqlarının inkişaf etdirilməsinin vacibliyini xüsusi qeyd edib və bu sahənin Azərbaycan təhsilində əsas problemlərdən biri olduğunu bildirib. O vurğulayıb ki, cəmiyyətin və bəzi hallarda repetitorların müqavimətinə baxmayaraq, bu bacarıqların ölçülməsi genişləndirilməlidir. Nazirin sözlərinə görə, bu dəyişikliklər qısamüddətli perspektivdə çətin görünsə də, uzunmüddətli dövrdə fərdlərin peşəkar inkişafına mühüm təsir göstərəcək.