Evdə təhsil alan şagirdlərə dəstək layihəsinin icrasına başlanılıb

“Birgə və Sağlam” İctimai Birliyi Elm və Təhsil Nazirliyi tərəfindən 2025-ci ildə həyata keçirilən “Elm və təhsil sahəsində ictimai təşəbbüslərin dəstəklənməsi” qrant müsabiqəsi çərçivəsində “Evdə təhsilə cəlb olunan xüsusi qayğıya ehtiyacı olan şagirdlərin və onların ailələrinin dəstəklənməsi” adlı layihənin icrasına başlayıb.

"Azərbaycan müəllimi" xəbər verir ki, layihə çərçivəsində müəllimlər üçün “Autizmi anlamaq: Elmi və praktik baxış” adlı seminar keçirilib, seminar çərçivəsində “Autizm nədir?” və “Tətbiqi davranış analizinin praktiki tətbiqi” mövzuları əhatə olunub. Bununla yanaşı, “Tətbiqi davranış analizi” üzrə praktiki təlimlər davam etməkdədir.

Növbəti mərhələdə valideynlər üçün “Evdə təhsil və psixoloji dəstək” adlı təlimlər, uşaqlar üçün “Motivasiya və sosial bacarıqlar” mövzusunda məşğələlər təşkil olunacaqdır. Bununla yanaşı, davamlı təhsil və informasiya mübadiləsini təmin etmək məqsədilə Autizm portalında “Evdə Təhsil Resurs Mərkəzi” adlı bölmə yaradılacaqdır.

Xatırladaq ki, layihə 6 ay müddətində “Birgə və Sağlam” İctimai Birliyi tərəfindən icra ediləcək.

Layihənin əsas məqsədi evdə təhsil alan xüsusi qayğıya ehtiyacı olan şagirdlərin sosial və təhsil inkişafına dəstək vermək, onların ailələrinə psixoloji və pedaqoji dəstək göstərmək, evdə təhsilin keyfiyyətini və inklüzivliyini artırmaq, həmçinin valideynlərin və müəllimlərin inklüziv və xüsusi təhsil sahəsində bilik və bacarıqlarının inkişafına töhfə verməkdir.