VI Azərbaycan Astronomiya Olimpiadasının final mərhələsi keçiriləcək

Mayın 16-da saat 11:00-da VI Azərbaycan Astronomiya Olimpiadasının final mərhələsi keçiriləcək. Final mərhələsi Bakı şəhərində Bakı Dövlət Universitetində və Naxçıvan şəhərində 7 nömrəli tam orta məktəbdə təşkil olunacaq. Olimpiadanın respublika turunda 65 və daha yüksək bal toplayan şagirdlər olimpiadanın final turunda iştirak hüququ qazanıblar.

Final mərhələsinin qalibləri 25 sentyabr – 5 oktyabr tarixlərində Vyetnamın Hanoy şəhərində keçiriləcək XIX Beynəlxalq Astronomiya və Astrofizika Olimpiadasında iştirak üçün xüsusi hazırlıq dərslərinə cəlb ediləcəklər.

Olimpiadaya hazırlıq dərsləri BDU və Respublika Uşaq-Gənclər İnkişaf Mərkəzinin ekspertləri tərəfindən universitetdə və mərkəzdə təşkil olunacaq. Bundan əlavə, beynəlxalq olimpiadaya seçilmiş komanda üzvləri üçün N.Tusi adına Şamaxı Astrofizika Rəsədxanasında birhəftəlik yay düşərgəsi təşkil ediləcək. “Həvəskar Astronomlar Cəmiyyəti” İctimai Birliyi isə məktəblilərə teleskoplardan istifadə qaydaları ilə bağlı təlimlər keçəcək.

Komandanın Beynəlxalq Astronomiya və Astrofizika Olimpiadasında iştirakı Azərbaycan Respublikası Təhsil İnstitunun dəstəyilə baş tutur.

Qeyd edək ki, VI Azərbaycan Astronomiya Olimpiadası Cənubi Qafqazda yeganə planetarium olan Tusi-Bohm Planetariumun baş sponsorluğu ilə həyata keçirilir.