Hədəflərinə düzgün yolla irəliləyənlər – Tovuzun uğurlu məzunları ilə söhbət

“Azərbaycan müəllimi”nin budəfəki həmsöhbətləri ali məktəblərə builki qəbul imtahanlarında III ixtisas qrupu üzrə ölkə birincisi olan İlahə Məhərrəmzadə və müxtəlif müsabiqələrdə uğur qazanmış, Qarabağ Universitetinin ilk tələbələrindən olan Lalə Məmmədovadır. Onların hər ikisi orta təhsilini Qazax-Tovuz Regional Təhsil İdarəsinin tabeliyində fəaliyyət göstərən Tovuz rayon Mahir Ələkbərov adına tam orta məktəbdə alıb.

Yeri gəlmişkən, Regional Təhsil İdarəsinin tabeliyində fəaliyyət göstərən təhsil müəssisələrinin bir çox məzunları cari ildə III ixtisas qrupu üzrə ən yüksək nəticə göstərən abituriyentlər sırasında yer alıblar.

“Professional hüquqşünas kimi yetişdikdən sonra ölkəmə xidmət edəcəyəm”

İlahə Məhərrəmzadə DİM-in keçirdiyi buraxılış və qəbul imtahanlarında 692,5 bal toplayaraq III ixtisas qrupu üzrə ölkə birincisi olub. Prezident təqaüdünə layiq  görülüb, hazırda ADA Universitetinin Hüquq fakültəsində təhsil alır:

- Düşünürəm ki, ölkə birincisi olmaq çəkdiyim əziyyətlərə və çətinliklərə dəyəcək qədər qürurverici hiss idi, çünki mən valideynlərimin və müəllimimin etimadını doğrultmağı bacarmışdım.

İlahə ilə danışarkən səsindən qürur və özgüvəni asanlıqla sezmək olurdu. Ucqar bölgədə təhsil almasına baxmayaraq, dünyagörüşü genişdir. 11 ildə məqsədinə doğru irəliləyərkən heç bir maneə tanımayıb: 

- Əgər çalışma yolunuzu düzgün seçsəniz və hədəflərinizə doğru irəliləsəniz, məqsədinizə asanlıqla çatacaqsınız. Təbii ki, öz üzərində işləyən üçün ölkə birinciliyi olmaq qaçılmazdır.

Təhsil sahəsindəki irəliləyişlərdə və şagirdlərin bilik göstəricilərinin yüksəlməsində Regional Təhsil idarələrinin və onların sektorlarının böyük rolu var. 

İlahənin orta məktəb ab-havasından sonra universitet həyatına adaptasiyası üçün müəyyən qədər zaman lazım olsa da, indi hər şey öz axarında davam edir, hətta o, qarşıdakı hədəflərini də müəyyənləşdirib:

- Universitet həyatı müstəqil bir fərd olduğumuzu, məsuliyyətlərimizin daha çox olduğunu bizə bir daha xatırladır. Gələcək planlarım bakalavriat səviyyəsi üzrə mübadilə proqramı çərçivəsində xaricdə təcrübə keçmək, magistr təhsilini xaricdə almaqdır. Professional hüquqşünas kimi yetişdikdən sonra ölkəmə xidmət edəcəyəm.

“Təhsil dünyanı dəyişmək üçün ən yaxşı silahdır”

Növbəti həmsöhbətimiz Lalə Məmmədovadır. O da Tovuz rayon M.Ələkbərov adına tam orta məktəbin məzunudur. Lalənin 11 illik təhsil həyatında çoxsaylı uğurları olub: 

- Məktəb illərində bir çox nailiyyətlər əldə etmiş, fərmanlarla təltif olunmuşam. Respublika fənn olimpiadalarında davamlı iştirak edərək final mərhələsinə kimi yüksəlmişəm. 2024-cü ildə DİM-in keçirdiyi buraxılış və qəbul imtahanlarında ümumi olaraq 522.9 bal toplamışam.

Təhsili dünyanı dəyişmək üçün güclü silah sayan Lalə deyib ki, Qarabağ Universitetinin açılma xəbərini eşidərkən imtahan nəticələri hələ bəlli olmayıb. Buna baxmayaraq, tərəddüd etmədən bu məktəbdə oxuma qərarını verib. Ailəsi, müəllimləri də seçimində onu dəstəkləyib. 

- Qarabağ Universitetini seçməklə çox yaxşı qərar verdiyimi düşünürəm. 30 ildir həsrətini çəkdiyimiz Qarabağımızda təhsil almaq, universitetin ilk tələbələrindən biri olmaq qürurvericidir. Düşünürəm ki, Qarabağda təhsil almaq ailəmin və müəllimlərimin mənə aşıladığı vətənpərlik hissindən irəli gəlir. Qeyd edim ki, mən Tovuz döyüşlərinin canlı şahidi olmuşam və heç vaxt qorxmamışam, əksinə, cəhbəyə belə getmək istəmişəm. Həmin dövrdə belə bir deyim var idi: Qarabağa gedən yol Tovuzdan keçir. Şadam ki, Qarabağda oxuyuram. Bu sevinci bizə yaşadan şəhidlərimiz qarşısında baş əyirəm.

Unversitetin Tarix fakültəsində təhsil alan Lalənin məqsədi dövrünün ən yaxşı tarixçilərindən biri olub ölkəmizin tarixini dünyaya daha düzgün təqdim etməkdir. 

Düzü, yeni universitetin tələbə həyatı çox maraqlı gəldi. Dərsləri necə gedir, nə keçirlər? Bu sual sanki Lalənin ürəyincə oldu. Həvəslə gündəlik dərs rejimindən danışdı:

- Həftə içi hər gün saat 09:00-da dərslərimiz başlayır. Dərs müddəti 80 dəqiqədir və çox maraqlı keçir. Müəllimlərimiz dünyanın müxtəlif ölkələrində təhsil almış, ən qabaqcıl metodlarla dərs tədris edirlər. Gün ərzində tələbə yoldaşlarımızla xoş, əyləncəli vaxt keçiririk, növbəti dərs gününə hazırlaşırıq. Buradakı bütün tələbələr universitetə çox qürurla gəlirlər. Vətənimizin qoxusunu artıq hər gün doya-doya içimizə çəkirik. 

Bununla yanaşı, Lalə indi yaşadığı arzuolunan tələbəlik həyatına görə məktəb həyatına minnətdardır. O, oxuduğu orta məktəbin müəllimlərinə də təşəkkür etməyi özünə borc bildi:

- Təhsil aldığım müddətdə başda məktəbimizin direktoru Sadiq Rəhimov olmaqla, bütün müəllim kollektivi bizə çox böyük dəstək göstərdi. Bizi öz övladlarından ayırmayan sinif rəhbərimiz yeni yolda addımlamağımıza böyük dəstək oldu və heç vaxt bizim əlimizi buraxmadı. Bugünkü uğurumda başda ailəm olmaqla sinif rəhbərim İlahə Bayramovanın da böyük rolu var.