Peşə təhsili alıb öz şirkətini qurdu

“Bakı Strafor Kəsim” MMC şirkətinin rəhbəri 35 yaşlı sahibkar Nahid Eminov peşə təhsili ilə yüksəlib. İndiki Mədəniyyət və Sənətkarlıq üzrə Peşə Təhsil Mərkəzindən “Tornaçı” ixtisası üzrə məzun olub.

Nahid Eminov indi bir sahibkar ömrü yaşayır. Amma öz işinin sahibi olana qədər çətin yollardan keçib…. Hərflərdən, rəqəmlərdən əvvəl məcburi köçkünlüyü öyrənib. Füzulinin ömrünə işğal yazılanda, ailəsi, kəndçiləri, elliləri ilə birlikdə “məcburiyyət”lə tanış olub. Onda 3 yaşı vardı, indi 35 yaşındadır. Körpə kimi çıxdığı yurduna özündən əvvəl əl işləri gedib. İstehsalçısı olduğu strafor işğaldan azad olan ərazilərimizdə tədbirlərə bəzək olur. Ən çox qürurlandığı işlərindən biri də məhz bu torpaqlarda – Şuşadadır.

Təhsilinə və karyerasına istiqamət verən tövsiyələr…

Onun hekayəsində ən maraqlı ayrıntıdır bu. Aldığı ən qiymətli tövsiyələr həyatına istiqamət verib. Müəllimlərinin göstərdiyi yol ilə gedib, öz yolunu tapıb.

Ailəsi məcburi köçkün kimi əvvəlcə Salyanda, sonra Beyləqanda məskunlaşıb. Çox kasıb olan ailənin gözünə o illərdə Nahidin təhsili də görünməyib. 2000-ci ildə ailəlikcə Bakıya köçüblər. O da Xəzər rayonundakı Füzuli Gözəlov adına 124 nömrəli tam orta məktəbə gedib. Günümüzün sahibkarlarından olmasında başlıca rol oynayan tövsiyələri məktəb illərində alıb. İstiqamətləndirici ilk tövsiyəni məktəbdə müəllimindən alıb. Onun istedadını görən rəsm müəllimi bu bacarığı inkişaf etdirməsi üçün dərnəyə yazılmağını məsləhət bilib: “Biz çox kasıb olmuşuq. Rəsm bacarığımı Bakıda müəllimim üzə çıxardı. Rəsm müəllimim Gülyanaq müəllim mənə tövsiyə etdi ki, rəsm dərnəyinə gedim. Onda hələ VII sinifdə oxuyurdum. Elə müəllimimin tövsiyəsi ilə Firuz müəllimin dərnəyinə yazıldım. Xəzər rayon Mədəniyyət Mərkəzində rəsmlə məşğul olmağa başladım”.

Beləliklə, VII sinifdə də olsa, aşkarlanan rəssamlıq bacarığı inkişaf edib. 2 il sonra, yəni o, IX sinifdə oxuyarkən məktəblərinə gələn qonaqlar onun həyatının sonrakı mərhələsini müəyyənləşdirib. Həmin yeni mərhələdə rəssamlıq yox idi: “Məktəbimizə peşə məktəbindən nümayəndələr gəlmişdi. Onlar peşə təhsilindən danışdılar. Barəsində danışdıqları ixtisaslar arasında mənim üçün maraqlı olan sahə – avtomobil də vardı. Mən də qərarımı verdim. IX sinfi bitirən kimi məktəbdən sənədlərimi alıb peşə təhsilinə üz tutdum. Avtomobil üzrə elektrik ixtisasını seçdim. Amma bu ixtisas üzrə təşkil edilən qrup artıq dolmuşdu”.

Dəmirin dəmiri necə kəsdiyini görmək üçün tornaçı oldu

Həyatına yön verən daha bir əhəmiyyətli tövsiyəni də peşə məktəbində alıb: “Buzovnadakı 5 nömrəli peşə liseyinin direktor müavini dedi ki, avtomobil ixtisasları dolub, amma yiyələnə biləcəyim başqa maraqlı peşə var. Özü də sevdiyim yerdən cəlb etdi məni – avtomobildən. Mənə dedi ki, tornaçı ixtisasına yiyələnim. “Avtomobil ixtisaslarına marağın var, amma bu ixtisas onun qədər, hətta ondan da maraqlıdır. Hətta bu peşədə avtomobil hissələrinin necə hazırlandığını öyrənəcəksən”, - dedi. Mənə də maraqlı gəldi ki, maşın hissələri də dəmir, bu alətlər də dəmir, dəmir dəmiri necə kəsir? Bu düşüncə ilə də marağım artdı və adını eşitmədiyim, özünün nə olduğunu bilmədiyim, kim olacağımı düşünmədən bu ixtisası oxumaq qərarına gəldim”.

Beləliklə, N.Eminov daha bir tövsiyə ilə IX sinifdən məktəblə vidalaşıb, peşə təhsilinə üz tutub. Tezliklə ixtisasını sevməyə başlayıb. Dərslərinə böyük maraq göstərərək sənətinə kamil şəkildə yiyələnmək üçün əlindən gələni edib. Yaxşı oxuyaraq təhsilini IV dərəcəli tornaçı kimi tamamlayıb: “Bu ixtisası bitirəndə hər kəs III dərəcə alırdı. Mən təhsilimdə fərqləndiyim üçün IV dərəcə ilə bitirdim. Təcrübəyə Müdafiə Sənayesi Zavoduna göndərildim. 3 aylıq təcrübə dövründə də fərqləndim və təhsilim bitən kimi məni burada işə götürdülər”.

Amma zavodda çox işləməyib. Peşə təhsilli olması özünə olan güvənini artırmışdı axı: “Gənc olduğum üçün yaxşı pul vermir, az pulla çox işlədirdilər. 2007-ci ildə iş yerimi dəyişərək Buzovna Şokolad Fabrikində işləməyə başladım. Təhsil aldığım ixtisas üzrə fəaliyyətimə tezliklə ara verərək hərbi xidmətə getdim. Qayıdanda dostlarla görüşmək məqsədilə getmişdim zavoda, amma işə qayıtmağımı təklif etdilər. Mən də məmnuniyyətlə işimə geri döndüm”.

Ürəyincə olan ixtisası üzrə, ürəyincə olan iş yerində 11 il fəaliyyət göstərən qəhrəmanım bu iş yerində iş şəraiti, iş imkanları dəyişəndə çox düşünməyib, işdən ayrılıb. Aldığı təhsillə yanaşı, artıq yığdığı təcrübəsi də vardı ki, bu da özgüvənini artırırdı. O da öz işini qurmaq barədə düşünməyə başlayıb: “2013-cü ildə işdən ayrıldıqdan sonra şəxsi biznesini qurmaq barədə düşünməyə başladım. Bu istiqamətdə axtarışlarım nəticə verdi. Sosial şəbəkələrdə qarşıma çıxan məlumatlar əsasında araşdırıb straforun üstünlüklərini gördükdən sonra onun ölkəmizdə də hazırlanması üçün hərəkətə keçdim”.  

“Heç kimdən kömək, dəstək almadan, sadəcə ustalığımla qəpiyin üstünə qəpik qoyub öz biznesimi qurmuşam”.

Strafor köpük istehsalında ölkədə mövcud boşluqdan yararlanan N.Eminov bu sahədə öz sözünü deməyə, ən mürəkkəb dekorasiyalara öz imzasını atmağa qərar verir. Beləliklə, sifariş aldığı heykəllər, dekorativ işlər, səhnə, toy, hətta dövlət tədbirlərinin sayı hər gün artır. Nahidin əlində strafor, yəni bildiyimiz penoplast möcüzəyə çevrilməyə başlayır: “Straforun üstünlükləri çoxdur. Verilən sifarişi vaxtında hazırlamağa imkan verir. Mənfi cəhəti isə kövrək olmasıdır. Biz bunu istehsal zamanı nəzərə alır, daha davamlı olmasını təmin edən materiallardan istifadə edirik. Bu sahəyə yönəlməyim yaradıcı işlə məşğul olmağı sevməyimdən qaynaqlanır. Artıq 10 ildən çoxdur bu sahədəyəm. Maraqlı, sevdiyim işlərim çoxdur. Amma ən yaddaqalan layihəni Şuşa üçün hazırladım. Cıdır düzündə səməni maketi bizim işimizdir”.

Gənc sahibkarın sözlərinə görə, strafor qazanclı sahədir, amma əziyyəti də çoxdur: “İncəliklərini bilmək lazımdır ki, qazancı olsun”.

Rəssamlıq qabiliyyəti yüksəlişində əsas rol oynasa da, o aldığı peşə təhsilinə, tornaçılığa minnətdardır. Çünki uğurunun mayasında rəssamlıq bacarığı varsa, yüksəlişinin təməlində də tornaçılıq üzrə aldığı peşə təhsili var: “Ayrı-ayrı yerlərdə işlədim, işdən imkan tapdıqca əlavə sifarişlər götürüb, məhz tornaçılıqla məşğul oldum. Bu peşəni təhsil aldığım peşə təhsili müəssisəsində öyrəndim. Məhz orada bu sənəti öyrətdilər, təcrübə verdilər. Ölçülərdə dəqiqliyi məhz təhsil alarkən öyrəndim. Bu işdə uğur qazandım, sifarişim çox oldu. Tornaçılıqdan qazandığım vəsaitlə iş qura bildim. Bir sənətim olsun, deyirdim, oldu. Özümü sahibkar yox, usta hesab edirəm, ustalığımla qürur duyuram. Çünki  həyatda qazandığım hər şeyi ustalığımla əldə etmişəm. Heç kimdən kömək, dəstək almadan, sadəcə ustalığımla qəpiyin üstünə qəpik qoyub öz biznesimi qurmuşam”.

“İş qurmuşam, amma işçi tapa bilmirik”.

Gələcəyi ilə bağlı planları çoxdur. Ən böyük planları isə işini yeni nəslə öyrətməklə bağlıdır: “İş qurmuşam, amma işçi tapa bilmirik. Bu məsələdə Elm və Təhsil Nazirliyindən, xüsusən, Peşə Təhsili üzrə Dövlət Agentliyindən, o cümlədən, Gənclər və İdman Nazirliyindən dəstək gözləyirəm. Təklif edirəm ki, birlikdə layihələr həyata keçirək, bacarıqlı, zəhmətkeş gəncləri bizə yönəldərək bizə dəstək versinlər, biz də öz növbəmizdə gənclərə işimizi öyrədək. Biz işçi, dövlətimiz iş yeri qazansın. Yüzlərlə gəncin əlinə sənət verməkdə qürur duyarıq.  Bu məqsədlə Peşə Təhsili üzrə Dövlət Agentliyi ilə müqavilə də imzaladıq. Artıq müəssisəmizə təcrübəçi tələbələr göndərəcəklər. Biz onlara həm bu peşəni öyrədəcək, həm də işə götürəcəyik. İlk tələbələrimiz də artıq gəlib. Dekorator ixtisası üzrə təhsil alan qrupda 3 oğlan vardı, 3-ü də bizə təcrübəyə gəldi”.

Peşə təhsili alarkən öyrəndiklərimi təcrübədə istifadə etdiyini deyən N.Eminovun da tövsiyəsi var: “Gənclər öz sahələrini mükəmməl öyrənməlidirlər”.