“İntellekt” məktəb-liseyin 95 illik yubiley tədbiri keçirilib

Uşaqlıq illərimdə baxdığım iki filmin müəllim peşəsinə yönəlməyimdə xüsusi rolu oldu: “Səni axtarıram” və “Bizim Cəbiş müəllim”. Bu əsərlərdə yaradılan Elçin və Cəbiş müəllim surətləri gələcək peşəmi seçməyimdə müstəsna rol oynadı: müəllim oldum. Bir neçə il Masallı rayonunun Qəriblər kəndində çalışdım. Sənətin sirlərini öyrəndikcə müəllim adının məsuliyyətini daha çox dərk etdim.                                                       

2004-cü ildə doğma paytaxta dönəsi oldum. Fəaliyyətimi Bakı şəhəri Səbail rayonu R.Hüseynov adına 49 nömrəli “İntellekt” məktəb-liseydə davam etdirdim. Məktəblə tanış olarkən məlum oldu ki, taleyimdə əvəzsiz rol oynamış “Bizim Cəbiş müəllim” filmi məhz bu məktəbdə çəkilib. Bu xoş təsadüfdən məmnunluq duyğusu yaşadım və daha şövqlə çalışmağa başladım. Müəyyən uğurlara imza atdım: “Ən yaxşı müəllim” müsabiqəsinin qaliblərindən biri olmağım, ölkə başçısı tərəfindən “Tərəqqi” medalı ilə təltif olunmağım sənətimə qarşı məsuliyyətimi daha da artırdı. Artıq iyirmi ildir ki, bu məktəbdə çalışıram. 95 illik zəngin tarixi olan bir məktəbdə azacıq da olsa, zəhmətimin olmasından qürur duyuram.

Bəli, bu il məktəbimiz şərəfli fəaliyyətinin 95-ci ildönümünü yaşayır. Bu münasibətlə ötən həftə akt zalında təntənəli yubiley tədbiri keçirildi. Tədbiri giriş sözü ilə açan “İntellekt” məktəb-liseyin direktoru Elza Bağırzadə məktəbin tarixindən, nailiyyətlərindən, uğurlu məzunlarından, həyata keçirilən layihələrdən ətraflı bəhs etdi. Ölkəmizdə təhsilə həmişə önəm verildiyini qeyd edən direktor rəhbərlik etdiyi təhsil müəssisəsinin əsas məqsədinin dövlətin təhsil siyasətinə töhfə vermək olduğunu xüsusi vurğuladı.

Bakı Şəhəri üzrə Təhsil İdarəsinin müdir müavini Anar Qədiməliyev çıxış edərək cəmiyyətdə məktəbin, müəllimin müstəsna rolu haqqında fikirlərini bildirdi. A.Qədiməliyev 49 nömrəli məktəbin səmərəli fəaliyyəti haqqında xoş sözlər söyləyərək pedaqoji heyətə yeni-yeni uğurlar arzuladı.

Bakı Şəhər İcra Hakimiyyətinin şöbə müdiri Elmin İmanov isə məzunu olduğu məktəblə, müəllimləri ilə həmişə fəxr etdiyini xüsusilə qeyd etdi. Onun təhsil illəri ilə bağlı söylədiyi xatirələr iştirakçılara duyğulu anlar yaşatdı. 

Məktəbin şəhid məzunlarının valideynlərinin təsirli çıxışları iştirakçıları kövrəltməklə yanaşı, hamıya qürur hissi yaşatdı. Onlar məktəb kollektivinin doğma münasibətini hər an hiss etdiklərini qeyd edərək həm övladları, həm də övladlarının oxuduqları məktəblə qürurlandıqlarını söylədilər.

Sonra məktəbin tanınmış məzunlarının fəaliyyəti, doğma təhsil ocağına təbrikləri ilə bağlı videoçarx nümayiş etdirildi. Uğurlarının təməlində məhz təhsil aldıqları məktəbin danılmaz rolunu qeyd edən məzunların səsində fəxarətlə yanaşı, kövrək notların olduğu da sezilirdi.   

Daha sonra şagirdlərin ifasında xalq mahnı və rəqslərindən ibarət ədəbi-bədii kompozisiya nümayiş etdirildi. 

Tədbiri seyr edənlər arasında mən də var idim. Qürurlu idim: təkcə müəllim adı ilə deyil, həm də məhz 49 nömrəli məktəbin müəllimi olduğuma görə.

Elçin Manafov,
49 nömrəli “İntellekt” məktəb-liseyin ədəbiyyat müəllimi