SDU-nun İqtisadiyyat və idarəetmə fakültəsinə yeni dekan seçilib

Sumqayıt Dövlət Universitetinin İqtisadiyyat və idarəetmə fakültəsinə yeni dekan seçilib.

Bu barədə “Azərbaycan müəllimi”nə universitetdən məlumat verilib.

Qeyd olunub ki, Loğman Abdullayev 1990-1995-ci illərdə Azərbaycan Dövlət İqtisad Universitetində iqtisadi kibernetika ixtisası üzrə ali təhsil alıb və iqtisadçı-riyaziyyatçı ixtisasına yiyələnib. 2005-ci ildə “İstehlak bazarı və onun tənzimlənməsi problemi” mövzusunda namizədlik dissertasiyasını müdafiə edərək iqtisad elmləri namizədi elmi dərəcəsini alıb, 2012-ci ildə isə dosent elmi adına layiq görülüb.

2018-2023-cü illərdə Sumqayıt Dövlət Universitetində elmlər doktoru proqramı üzrə dissertant olub və “Azərbaycanda insan kapitalından istifadənin səmərəliliyinin artırılması istiqamətləri” mövzusunda tədqiqat aparıb.

Loğman Abdullayev beynəlxalq təcrübə proqramlarında iştirak edib. O, 2018-ci ildə Vyana Tətbiqi Elmlər Universitetində (Avstriya) və Valensiya Politexnik Universitetində (İspaniya) təlimlərdə və beynəlxalq konfranslarda iştirak edib, 2019-cu ildə Sankt-Peterburq Dövlət İqtisad Universitetində ixtisasartırma kursunu uğurla başa vurub. 2024-cü ilin oktyabr ayında London Maliyyə Menecerləri İnstitutunun (İCFM) təlimlərini uğurla keçərək beynəlxalq diplom əldə edib.

O, 2 dərs vəsaiti, 1 monoqrafiya, 1 metodiki göstəriş, 16 fənn proqramı, 68 məqalə və tezisin müəllifidir. Loğman Abdullayev həmçinin beynəlxalq sertifikatlara malikdir və maliyyə uçotu sahəsində təlimlər aparır.