BDU-nun Qazax filialında 2024-cü ildə elmi fəaliyyət uğurlu olub

Bakı Dövlət Universitetinin Qazax filialıında yola saldığımız 2024-cü ildə elmi fəaliyyət uğurlu olub. 

Bu barədə universitetdən “Azərbaycan müəllimi”nə məlumat verilib. Bildirilib ki, hesabat ili ərzində filial əməkdaşlarının bütövlükdə 200-dən çox elmi işi nəşr edilib. Bu işlərin icrası ümumilikdə filialın 87 (ştat, əvəzçi) nəfər əməkdaşı (Riyaziyyat və informatika kafedrası üzrə 22, İctimai və təbiət fənləri kafedrası üzrə 66, Dil, ədəbiyyat və onların tədrisi metodikası kafedrası üzrə 24, Pedaqoji fənlər kafedrası üzrə 27) tərəfindən yerinə yetirilib. Bunlardan 3 proqram, 62 məqalə, 76 tezisdir.

Onu da qeyd edək ki, bu işlərdən 19 məqalə və 71 tezis beynəlxalq konfransların materiallarında, 9 məqalə və 6 konfrans materialları xaricdə nəşr olunan jurnallarda çap edilib. İllər üzrə müqayisə aparılanda uğurlu nəticələr daha aydın şəkildə görünür. Belə ki, 2019-cu ildə çap olunan elmi işlərin sayı 57, 2020-ci ildə 66, 2021-ci ildə 103, 2022-ci və 2023-cü illərdə isə 130  olmuşdur. Digər elmi işlər respublika əhəmiyətli elmi konfranslarda və ixtisaslaşmış jurnallarda çap edilib. Eyni zamanda kafedralarda müəyyənləşdirilmiş istiqamət və mövzular üzrə təsdiqlənmiş qrafik əsasında əməkdaşlar tərəfindən elmi işlər yerinə yetirilib. Filialın əməkdaşları hesabat dövründə müxtəlif xarakterli konfranslarda iştirak edib və elmi jurnallarda məqalələri çap olunub.

Qeyd etmək yerinə düşər ki, hesabat ili ərzində filialda beynəlxalq elmi konfrası keçirilib. 05-06 dekabr 2024-cü ildə “Yaşıl Dünya Naminə Həmrəyli ili” ilə əlaqədar “Yaşıl Dünya-Bizim Dünya” mövzusunda Beynəlxalq Elmi Konfransı keçirilib. Konfransda 180-dən çox elmi məruzələr dinlənilib və materiallar toplu halında çapa tədqim olunub. Konfransa respublikamızda fəaliyyət göstərən 14 universitet,  AMEA-nın 4 Tədqiqat İnstitutu, Regional təhsil  idarələrinin, eləcə də Türkiyə və Rusiyadan olan alimlərin və elmi əməkdaşların işləri daxil olub.

Hesabat ilində filialda İctimai və təbiət fənləri kafedrası – üzrə 39 məqalə, 25 tezis, 1 metodik vəsait, 1 proqram çap olunub. Kafedra 7 problem, 7 istiqamət və 23 mövzu üzrə elmi-tədqiqat işinin üçüncü mərhələsini yerinə yetirilib. 19 müəllimin rəhbərliyi ilə 34 nəfər tələbə elmi-tədqiqat xarakterli işi aparılıb. Dil, ədəbiyyat və onların tədrisi metodikası kafedrası – üzrə 10 məqalə, 14 tezis çap olunub. Kafedra 1 problem, 2 istiqamət üzrə elmi-tədqiqat işinin üçüncü mərhələsini yerinə yetirilib. 6 müəllimin rəhbərliyi ilə 15 nəfər tələbə elmi-tədqiqat xarakterli işi yerinə yetirib. Riyaziyyat və informatika kafedrası – üzrə 6 məqalə, 16 tezis çap olunub. Kafedra 1 problem, 4 istiqamət üzrə elmi-tədqiqat işinin üçüncü mərhələsi həyata keçirilib. 7 müəllimin rəhbərliyi ilə 25 nəfər tələbə elmi-tədqiqat xarakterli işi yerinə yetirib.  Pedaqoji fənlər kafedrası – üzrə 7 məqalə, 20 tezis, 2 proqram çap olunub, 4 onlayn təlim keçirilib. Kafedra 1 problem, 2 istiqamət üzrə elmi-tədqiqat işinin üçüncü mərhələsini yerinə yetirib. 7 müəllimin rəhbərliyi ilə 13 nəfər tələbə elmi-tədqiqat xarakterli işi həyata keçirib. Eyni zamanda, kafedralarda aktual mövzularda elmi seminarlar da təşkil edilib.

Müvafiq Əsasnamənin tələblərinə uyğun olaraq tədris ilinin hər bir semestrində filialda Tələbə Elmi Cəmiyyətinin kafedralar üzrə tələbə elmi dərnəklərinin hesabatları dinlənilib. Cari ilin iyun ayında filialın şəhid məzunları baş leytenant Niftalı Orucov və leytenant Məhəmməd Məmmədovun xatirəsinə həsr olunmuş Tələbə Elmi Cəmiyyətinin Elmi Konfransı keçirilib.

Bütün bunlarla yanaşı olaraq, filialın elmi-pedaqoji kadrlara olan ehtiyacını ödəmək məqsədilə əməkdaşların dissertantura və doktorantura təhsilinə cəlb edilməsi daim diqqət mərkəzində saxlanılır. Belə ki, 2024-cü ildə filialın 12 nəfər əməkdaşı dissertantura və doktorantura təhsilini davam etdirib. Hesabat dövründə 1 nəfər ATİ-nin dissertanturasında fəlsəfə doktoru üzrə elmi iş müdafiə edib. 1 nəfər yaşayış yerini dəyişdiyi üçün siyahıdan çıxarılıb. Hazırda filialda 10 nəfər doktorantura və dissertantura üzrə təhsillərini davam etdirir. Onlardan 6 nəfər BDU-nun dissertanturasında, 1 nəfər AMEA Coğrafiya İnstitutunda dissertant, 1 nəfər AMEA-nın Botanika İnstitutunda dissertant, 1 nəfər Nizami Gəncəvi adına Ədəbiyyat İnstitutu, 1 nəfər Türkiyə Cumhuriyyəti Bandırma On yedi Eylül Üniversitesi Gönen Jeotermal Enstitiüsüda doktorant  olaraq elmi-tədqiqat işləri aparmaqla təhsil alır. Filialın elmi-pedaqoji kadrlara olan ehtiyacının ödənilməsi və tədrisin daha müasir tələblər səviyyəsində təşkili məqsədilə bu istiqamətdə görülən işlər yüksələn dinamika üzrə davam etdirilir.