Bakı Avrasiya Universitetləri Sammitinə ev sahibliyi edəcək

Bakı Avrasiya Universitetləri Sammitinə ev sahibliyi edəcək

Bu ilin sentyabr ayında Bakıda THE Avrasiya Universitetləri Sammiti ("THE Eurasia Universities Summit") keçiriləcək.

"Azərbaycan müəllimi" xəbər verir ki, beynəlxalq reytinq təşkilatı "Times Higher Education" (THE) sammitin keçirilməsi üçün Azərbaycanın Elm və Təhsil Nazirliyi, Elm və Ali Təhsil üzrə Dövlət Agentliyi ilə əməkdaşlıq edəcək.

Sammit çərçivəsində universitet rəhbərləri, siyasətçilər, dövlət və qeyri-hökumət təşkilatlarının yüksəkvəzifəli şəxsləri Azərbaycan paytaxtında bir araya gələrək Şərq və Qərbin kəsişməsində yerləşən, sürətlə inkişaf edən, qlobal ali təhsil mərkəzi olan Avrasiyanın potensialını müzakirə edəcəklər.

THE-nin qlobal məsələlər üzrə baş mütəxəssisi Fil Bati qeyd edib ki, Azərbaycanın Elm və Təhsil Nazirliyinin  bu dəstəyi Avrasiyanın ali təhsil sektorunun inkişafına töhfə verəcək.
Onun sözlərinə görə, Azərbaycan 2025-ci il üzrə "THE Impact Rankings"də əvvəlki ilə müqayisədə 56 % daha çox universitetlə təmsil olunacaq: “Nəticələr 2025-ci ilin iyun ayında İstanbulda keçiriləcək Qlobal Davamlı İnkişaf Konqresində elan ediləcək. Konqresdə Azərbaycan ölkə üzrə davamlı inkişaf gündəliyini dəstəkləyən milli pavilyona ev sahibliyi edəcək. Bakıda keçiriləcək birgə tədbirimiz isə bu dərin tərəfdaşlığın həqiqi zirvəsi olacaq.

Qeyd edək ki, ötən il Elm və Təhsil Nazirliyi Azərbaycan universitetlərini dünya səviyyəli tədqiqatlar aparan müəssisələrə çevirmək və onların qlobal nüfuzunu yüksəltmək məqsədilə THE ilə strateji tərəfdaşlıq qurub.