Londonda azərbaycanlı mütəxəssisləri tələbələrlə bir araya gətirən tədbir keçirilib

Londonda azərbaycanlı mütəxəssisləri tələbələrlə bir araya gətirən tədbir keçirilib

London İqtisadiyyat və Siyasi Elmlər Məktəbinin (LSE) Azərbaycan Cəmiyyətinin təşkilatçılığı, Azərbaycan Respublikasının Böyük Britaniyadakı Səfirliyinin dəstəyi ilə "Karyera paneli müzakirəsi: Ekspertlərdən dərslər" adlı tədbirə ev sahibliyi edib.

"Azərbaycan müəllimi" xəbər verir ki, həm kampusda, həm də onlayn formatda keçirilən müzakirəyə 100-dən çox iştirakçı qatılıb.

Panel müzakirəsi Azərbaycanın müxtəlif sahələrdə uğur qazanmış mütəxəssislərini tələbələrlə bir araya gətirib. Belə ki, müxtəlif şirkətlərdə çalışan azərbaycanlı mütəxəssislər – Günel Səlimova, Cəlal Məmmədzadə, Xəyalə Eylazova, Çinarə Əliyeva, Fuad İbrahimov, Aqşin Bəkirzadə, Günay Əliyeva və Nigar Cəfərova çıxış edərək təcrübələrini bölüşüblər. Panelçilər karyera inkişafı, peşəkar bacarıqlar və müasir iş dünyasında uğur qazanmaq üçün vacib məqamlar barədə faydalı məsləhətlər veriblər.

Görüşdə iştirak edən tələbələrin əksəriyyəti Dövlət Proqramı çərçivəsində Böyük Britaniyada təhsil alanlar olub.

Tədbirin sonunda iştirakçılar üçün şəbəkələşmə sessiyası təşkil edilib. Tələbələr ekspertlərlə birbaşa ünsiyyət quraraq, suallarını ünvanlamaq və karyera istiqamətləri haqqında əlavə məlumat əldə etmək imkanı qazanıblar. Panel müzakirəsi tələbələr üçün ilhamverici və maarifləndirici bir platforma kimi dəyərləndirilib.

Tədbirin təşkilatçıları Aysu Əliyeva, Zeytuna Sultanzadə və təşkilatçı heyətin digər üzvləri görüşün uğurla baş tutmasından məmnunluq duyduqlarını bildirib, tədbirin keçirilməsində dəstək göstərən Böyük Britaniyadakı Azərbaycan səfirliyinə və səfir Elin Süleymanova təşəkkürlərini ifadə ediblər.

Tələbələrin peşəkar inkişafına töhfə verən bu cür tədbirlərin davamlı olaraq keçiriləcəyi qeyd olunub.