Şagirdlər arasında keçirilən voleybol yarışının qalibləri mükafatlandırılıb

Şagirdlər arasında keçirilən voleybol yarışının qalibləri mükafatlandırılıb

Gəncə-Daşkəsən Regional Təhsil İdarəsinin təşkilatçılığı, "Gəncə" Voleybol Klubunun dəstəyi ilə Gəncə İdman Sarayında 8-11-ci sinif şagirdləri arasında voleybol yarışının bağlanış mərasimi keçirilib.

Gəncə-Daşkəsən Regional Təhsil İdarəsindən “Azərbaycan müəllimi”nə verilən məlumata görə, bağlanış mərasimində İdarənin müdiri Elçin Kərimov, Yeni Azərbaycan Partiyası Gəncə şəhər təşkilatının sədri Bayram Aslanov, Gəncə-Daşkəsən Regional Gənclər və İdman İdarəsinin rəisi Elvin Quliyev, Gəncə Voleybol Klubunun prezidenti Elvar Osmanov və digər ümumtəhsil məktəblərinin müəllim və şagirdləri iştirak ediblər.

“Sağlamlıq və təhlükəsizlik” aylığı çərçivəsində keçirilən voleybol yarışında 46 komandada 552 şagird iştirak edib. Məktəb, məktəblərarası və region olmaqla 3 mərhələdə keçirilən yarışın yekun final mərhələsinin nəticələrinə əsasən:

- Oğlanlar arasında: 
 - I yerə Gəncə şəhər M.Füzuli adına 22 nömrəli tam orta məktəbin komandası,
 - II yerə Daşkəsən şəhər Anar Mürsəlov adına 2 nömrəli tam orta məktəbin komandası,
 - III yerə isə Gəncə şəhər 23 nömrəli tam orta məktəbin komandası layiq görülüb.

- Qızlar arasında:
 - I yerə Gəncə şəhər 31 nömrəli tam orta məktəbin komandası,
 - II yerə Göygöl rayon Pənahlılar kənd tam orta məktəbin komandası,
 - III yerə isə Samux rayon Qarayeri qəsəbə 1 nömrəli məktəb-liseyin komandası çıxıb.

Qeyd edək ki, oğlanlar və qızlar arasında basketbol yarışları da davam edir. Növbəti günlərdə həmin yarışların final mərhələsi keçiriləcək.

"Sağlamlıq və təhlükəsizlik" aylığının keçirilməsində məqsəd 2024-2025-ci tədris ilində ümumi təhsil müəssisələrində təhsilalanların sağlamlığının və təhlükəsizliyinin təmin olunması, onların zərərli vərdişlərdən qorunması və sağlam həyat tərzinin formalaşdırılmasıdır.