Dünya əhalisinin 50%-i miopiyadan əziyyət çəkəcək – Araşdırma

Dünya əhalisinin 50%-i miopiyadan əziyyət çəkəcək – Araşdırma 

Amerika Oftolmologiya Akademiyası 2050-ci ilə qədər dünya üzrə miopiyaya (uzağıgörmə zəifliyi) rast gəlmə vəziyyətini və bu sahədə baş verəcək dəyişiklikləri araşdırıb. 

“Azərbaycan qəzeti” araşdırmalara istinadən bildirir ki, 2050-ci ilə qədər dünya əhalisinin 50%-i miopiyadan əziyyət çəkəcək. Proqnozlara görə, həmin dövrədək 1 milyard insanın yüksək miopiyadan əziyyət çəkəcəyi gözlənilir ki, bu da 2000-ci ildən 7.5 dəfə çoxdur.

Miopiya uzağıgörmə zəifliyinin əsas səbəblərindən biridir, müalicə olunmur. Bu xəstəlik əlavə görmə problemləri yaradır və patoloji göz dəyişiklikləri riskini artırır ki, bunlar da geridönməz proseslərə səbəb olur. Araşdırmalar miyopiya ilə bağlı vəziyyətin region və etnik qruplar üzrə fərqləndiyini göstərir. 

Miopiyanın artımı, əsasən, mühit amilləri, xüsusən açıq havada keçirilən zamanın azalması və genetik faktorlarla əlaqələndirilir. Mühit faktorları arasında "yüksəktəzyiqli" təhsil sistemləri, xüsusilə Sinqapur, Koreya, Tayvan və Çin kimi ölkələrdə uşaqların çox erkən yaşlardan elektron cihazlardan həddindən çox istifadə etməsi də var. Digər təklif edilən səbəblərə işıq, yemək rasionu və s. aiddir.

Bəzi ölkələrdə, məsələn, Sinqapur, Tayvan və Cənubi Koreyada orta məktəbi bitirənlərin 80%-dən çoxu miopiyadan əziyyət çəkir. Bu ölkələrdə xəstəliyin inkişafının qarşısını almaq dövlət səviyyəli təşəbbüsə çevrilib.

Qeyd edək ki, miopiya zamanı gözlərdə bulanıqlıq yaranır, insan şəkilləri retinal üzərində düzgün fokuslaya bilmir. 

Amerika Oftolmologiya Akademiyasının araşdırmasının məqsədi 2050-ci ilə qədər miopiya və yüksək miopiyanın qlobal miqyasda necə yayılacağını müəyyən etməkdir. 

Mənbə: https://www.aaojournal.org/article/s0161-6420(16)00025-7/fulltext