Azərbaycanlı qadın aşpaz “WorldSkills”in Yaxın Şərq və Şimali Afrika üzrə nümayəndəsi oldu

Azərbaycanlı qadın aşpaz “WorldSkills”in Yaxın Şərq və Şimali Afrika üzrə nümayəndəsi oldu

Azərbaycanlı istedadlı aşpaz Leyla Vəliyeva “WorldSkills Champions Trust”ın Yaxın Şərq və Şimali Afrika (MENA) üzrə yeni nümayəndəsi təyin edilib. 

“WorldSkills International” kulinariya üzrə yarışan ilk azərbaycanlı qadın aşpaz Leyla Vəliyeva haqqında məqalə dərc edib. “Azərbaycan müəllimi” həmin məqaləni təqdim edir:

Ölkəsini “WorldSkills” müsabiqəsində kulinariya üzrə təmsil edən ilk aşpaz Leyla o vaxtdan etibarən gələcək iştirakçılara mentorluq edir və öz ticarətini tanıdır.

Moldovada doğulub boya-başa çatan Leylanın yemək bişirmək sevgisi gənc yaşlarından başlayıb. O, mətbəxdə saatlarla vaxt keçirdiyini, anasının yemək bişirməsinə baxdığını və nəhayət, təkbaşına təcrübələr etdiyini xatırlayır. O, yeniyetmə ikən müstəqil olaraq yeməklər hazırlayır və yaradıcılığını dostları ilə bölüşürdü. Yetkinlik yaşına yaxınlaşdıqca kulinariya sahəsində karyera qurmaq təbii seçim kimi meydana çıxdı.

Ailəsi ilə birlikdə Azərbaycana qayıdan Leyla Bakıda yeni açılan “CÀSÀ” Kulinariya İncəsənət Mərkəzinə qəbul oldu. Proqramı bitirən ilk tələbələrdən biri olmaqla yanaşı, Böyük Britaniyada yerləşən ixtisas təşkilatı olan “City & Guilds”dən kulinariya sənəti üzrə sertifikatlar qazanıb. Məzun olduqdan sonra ona səfir-aşpaz kimi iş təklif edildi. O bu zaman mühazirələr oxuyur, ictimaiyyət qarşısında çıxış edirdi. 

Leyla “WorldSkills” haqqında ilk dəfə kulinariya təhsili aldığı illərdə tələbələri seçim prosesinə qoşulmağa dəvət edən broşürü görəndə öyrənib. Müəllimlərinin təşviqi ilə seçim prosesində iştirak edib və nəticədə, “WorldSkills Competition 2022 Special Edition”da Azərbaycanı təmsil etmək üçün seçildi. Təhsil aldığı məktəbi “Cooking for WorldSkills Azerbaijan”ın rəsmi partnyoru olduğu üçün o, “WorldSkills” hərəkatı ilə yaxından əlaqə saxlamış, təlim proqramlarında köməklik göstərmiş, yeni namizədlərə mentorluq etmiş və seçim proseslərinin təşkilinə kömək etmişdir.

Leyla Azərbaycanın Milli Kulinariya Komandasının tərkibində müxtəlif beynəlxalq tədbirlərində fəal iştirak edərək ölkəsini çoxsaylı müsabiqələrdə təmsil edib. Bu təcrübələr vasitəsilə Leyla öz sahəsində peşəkarlardan ibarət beynəlxalq şəbəkə qurub. "“WorldSkills” mənim gözlərimi açdı, çünki mənimlə eyni iş həvəsini paylaşan həmfikirlər ilə görüşmək və şəbəkə qurmaq mənim ilk təcrübəm idi", – deyə o bildirir.

Leyla bir çox qadınların kulinariya peşəsinə girərkən üzləşdiyi ictimai çətinliklər haqqında da danışıb. Azərbaycanda çox vaxt aşpazlıq karyerasından daha çox həkim və ya hüquqşünas kimi peşələri üstün tuturlar. Bundan əlavə, uzun saatlarla davam edən, bəzən gecə növbələri olan bu peşə xüsusilə mühafizəkar ailələrdən olan qadınlar üçün maneələr yarada bilir. 

Bu çətinliklərə baxmayaraq, Leyla öz missiyasında əzmlə davam edir: “Aşpaz olmaq və kulinariya sənətini öyrənmək mənim arzum idi”, – deyən Leyla sosial şəbəkələrdə vaxtaşırı ondan ilham alan digər gənc qızlardan mesajlar aldığını əlavə edir. “Belə mesajları oxuyanda doğru yolda olduğumu hiss edirəm və bilirəm ki, gördüyüm iş təkcə özüm üçün deyil, həm də məni əhatə edən gənc nəsil üçün vacibdir. Bu tədbirlərdə onların səsi olmaq bir imtiyazdır”, – o qeyd edir.

Leyla bu sahədə qadınları müdafiə etməklə yanaşı, davamlı yemək bişirməyə də həvəslidir. O, sağlam və ekoloji cəhətdən təmiz qida seçimlərinin önəmini vurğulayır və bitki mənşəli qidalar üzrə ixtisaslaşıb. "Ət Azərbaycan mətbəxinin böyük bir hissəsidir, lakin mən göstərmək istəyirəm ki, bitki mənşəli yeməklər də bir o qədər dadlı və doyumlu ola bilər", –  deyə o bildirir.

O öz işi ilə həm Azərbaycanda, həm də ölkədən kənarda kulinariya mədəniyyətinin dəyişməsinə töhfə verməyi ümid edir.

Özünün unikal keçmişi, beynəlxalq təcrübəsi və kulinariya sənətinə sarsılmaz bağlılığı ilə Leyla “WorldSkills Champions Trust” platformasından regiondakı gənc və bacarıqlı insanlara dəstək olmaq üçün istifadə etməyi arzulayır.