Məktəblilərin “Yaşıl layihə”ləri

Məktəblilərin “Yaşıl layihə”ləri

“Yaşıl dünya naminə həmrəylik ili” çərçivəsində ölkəmizdə də ekoloji mühitin qorunması ilə bağlı müəyyən tədbirlər həyata keçirilir ki, onların bir hissəsi sırf şagirdlər üçün nəzərdə tutulub. Təhsil sektorlarının bölgələrdə keçirdiyi tədbirlər məktəblilərə yaşıl təbiətimizi qorumaq baxımından məsuliyyət və sevgi hissi aşılayır. 

Qazax-Tovuz Regional Təhsil İdarəsi də 2024-cü ilin “Yaşıl dünya naminə həmrəylik ili” elan edilməsi ilə bağlı təsdiqlənmiş tədbirlər planına uyğun olaraq, bir sıra yerli və beynəlxalq əhəmiyyətli forum, konfrans, simpozium, “dəyirmi masa” və seminarlar keçirib. Bundan başqa, tədris ili ərzində məktəblərdə müxtəlif tədbirlər, sərgi və bilik yarışları təşkil olunub. 

Tovuz rayon Ağbulaq kənd M. Hümbətov adına tam orta məktəbdə “Təbiətdən incəsənətə” mövzusunda keçirilmiş əl işlərindən ibarət müsabiqə məktəbliləri mövcud problemlərin həlli yollarına cəlb etməklə yanaşı, onların istedadlarının da üzə çıxmasına imkan yaradıb. 

Tovuz STEAM Mərkəzində isə Tovuz, Ağstafa və Qazax rayonlarının STEAM dərsi tədris edilən məktəblərinin şagirdlərinin əl işləri nümayiş etdirilib. 

Qazaxın 1 nömrəli tam orta, Hacımahmudova adına ümumi orta məktəblərində, humanitar və təbiət fənlər təmayüllü məktəb-liseydə ətraf mühitin sağlamlaşdırılması, yaşıllıqların bərpası və artırılması, su ehtiyyatlarından və dayanıqlı enerji mənbələrindən səmərəli istifadə mövzusunda tədbirlər keçirilib.

İdarənin tabeçiliyində fəaliyyət göstərən “Peşə təmayüllü siniflər” layihəsinin mentorları "Yaşıl dünya naminə həmrəylik ili"nə həsr olunmuş "Təbiət bizik" adlı sosial-ekoloji düşərgə təşkil ediblər. 

Ağstafa rayonu üzrə təhsil sektorunun və Qazax-Tovuz Regional Mədəniyyət İdarəsinin təşkilatçılığı ilə "Elmli həyat, yaşıllıq yarat" adlı tədbir, Ağstafada yeniyetmə oğlanlar arasında “Yaşıl dünya naminə həmrəylik ili”nə həsr olunmuş, 105 nəfər idmançının iştirakı ilə voleybol üzrə rayon turniri keçirilib. Həmçinin Ağstafa təhsil işçiləri “Yaşıl dünya naminə həmrəylik ili” çərçivəsində keçirilən ağacəkmə aksiyasında iştirak edərək yaşıllıqların artırılmasına öz töhfələrini veriblər. “Yaşıl dünya naminə həmrəylik ili” və COP29-la bağlı Ağstafa rayon ümumtəhsil müəssisələrinin şagirdləri və onların valideyinlərinin iştirakı ilə keçirilən intellektual bilik yarışı isə nəinki şagirdləri, eyni zamanda valideynləri də həmrəyliyə cəlb edib. 

Həyata keçirilən bütün layihələrin məqsədi ətraf mühitin sağlamlaşdırılması, yaşıllıqların bərpası və artırılması, su ehtiyatları və dayanıqlı enerji mənbələrindən səmərəli istifadə, yaşıl enerji növlərinin yaradılması istiqamətində uşaq və gənclərin maarifləndirilməsidir.