“QS Quacquarelli Symonds” reytinq agentliyinin nümayəndələri BDU-da olub

“QS Quacquarelli Symonds” reytinq agentliyinin nümayəndələri BDU-da olub 

Bakı Dövlət Universiteti (BDU) ilə nüfuzlu “QS Quacquarelli Symonds” beynəlxalq reytinq agentliyinin nümayəndələri arasında görüş keçirilib.

Universitetdən “Azərbaycan müəllimi”nə bildirilib ki, görüşdə BDU rektoru Elçin Babayev, Elm və Təhsil Nazirliyi yanında Elm və Ali Təhsil üzrə Dövlət Agentliyinin direktoru Ülkər Səttarova, QS-in baş vitse-prezidenti Ben Sovter, analitika və qiymətləndirmə üzrə direktoru Leigh Kamolins, regional direktoru Sergey Xristoliubov iştirak edib.

Rektor Elçin Babayev BDU-nun tədris, elmi tədqiqat və beynəlmiləlləşmə istiqamətləri üzrə son illər ərzində əldə etdiyi uğurlara dair reytinq agentliyinin nümayəndələrinə geniş məlumat verib. QS-in baş vitse-prezidenti Ben Sovter BDU-nu “QS Dayanıqlılıq Reytinqi 2025” reytinq siyahısında 345-dən çox pillə irəliləməsi və 941-950-ci diapazonda qərarlaşaraq, Azərbaycanda TOP-1000-ə daxil olan yeganə ali təhsil müəssisəsi olması münasibəti ilə təbrik edib.

Görüşdə rektorun keyfiyyət təminatı üzrə müşaviri Asiman İlyasov reytinqlərlə iş istiqaməti üzrə görülən işlərə, eləcə də son illərdə əldə edilən uğurlara dair təqdimatla çıxış edib.

Daha sonra isə reytinq agentliyinin nümayəndələri ünvanlanan sualları cavablandırıblar.