Monitorinq imtahanında texniki nasazlıq olub, şagirdlərə əlavə vaxt verilib

Monitorinq imtahanında texniki nasazlıq olub, şagirdlərə əlavə vaxt verilib

Mayın 17-də paytaxtda monitorinq üçün ayrılmış 92 imtahan mərkəzində Azərbaycan və rus bölməsi üzrə 50 minə yaxın IV sinif şagirdi biliyini sınayıb.

Bu barədə "Azərbaycan müəllimi"nə Bakı Şəhəri üzrə Təhsil İdarəsindən məlumat verilib.

Bildirilib ki, lV sinif şagirdləri üçün keçirilən monitorinq zamanı 8 nömrəli tam orta məktəbdəki imtahan mərkəzində  yaranan texniki məsələlərlə bağlı operativ tədbirlər görülüb. Uşaqlara optimal müddət ərzində biliklərini nümayiş etdirmək üçün müvafiq vaxtın (150 dəqiqə) verilməsi təmin olunub.

Qeyd olunan həmin imtahan mərkəzində baş verən məsələ araşdırılıb. Monitorinqdə texniki səbəbdən problemlə üzləşən 46 nömrəli tam orta məktəb şagirdlərinin valideynləri ilə videogörüntülü görüş keçirilib, onlarla müvafiq söhbət aparılıb, valideynləri düşündürən suallara aydınlıq gətirilib.

Qeyd edək ki, monitorinqin nəticələri şagirdlərin qiymətləndirilməsinə təsir etmir. Monitorinqin keçirilməsində əsas məqsəd şagird nailiyyətlərinin yaxşılaşdırılmasına nail olmaq, müvafiq standartlar üzrə bilik və bacarıqların hansı səviyyədə formalaşdığını müəyyən etmək və tədrisin keyfiyyətinin artırılması istiqamətində tədbirlər həyata keçirməkdən ibarətdir.