“Buradan getmək istəmirik” – Həmkarlar İttifaqının istirahət mərkəzlərində yay tətili

“Buradan getmək istəmirik” – Həmkarlar İttifaqının istirahət mərkəzlərində yay tətili

Gecikməmək üçün jurnalistlər addımlarını sürətləndirirlər. Amma bu dəfə tələsik zala daxil olub xəbər yazmağa, yaxşı kadr tutmağa görə yox, uzun yolun yolçusu olmaq üçündür bu addımlar. İstiqamət isə paytaxtın səs-küyündən uzaq şimal bölgəsinədir. Belə ki, Milli Mətbuatın yaranmasının 150 illiyi ərəfəsində - iyulun 18-19-da Xaçmaz, Quba və Qusar rayonlarında yerləşən istirahət mərkəzlərinə yollanırıq.

Maraqlı söhbətlərimizə davam edə-edə yola çıxırıq. Uzun yolumuzun ilk dayanacağı Azərbaycan Həmkarlar İttifaqı Konfederasiyasının üzv təşkilatı Azərbaycan Dəmiryolçularının Müstəqil Həmkarlar İttifaqı Respublika Komitəsinin Xaçmaz rayonunda yerləşən “Lokomotiv” istirahət mərkəzidir. İstirahət məkanının adı da özü kimi əsrarəngizdir. Mərkəz 6 korpus və 6 kottecdən ibarətdir, bura 216 nəfərlik geniş bir dünyadır. Ərazidə yeməkxana, idman zalları, minifutbol meydançası, tibb məntəqəsi, hovuzlar və uşaqlar üçün əyləncə guşələri var. Media nümayəndələri burada gəzərək istirahət şəraiti ilə tanış olur, bir zamanlar səssiz olan divarlar indi sanki daha da canlanmışdı.
Yolumuz daha sonra Dövlət İdarələri və İctimai Xidmət İşçiləri Həmkarlar İttifaqı Respublika Komitəsinin “Ülfət” istirahət mərkəzinədir.

Təbiət qoynunda gizlənmiş bu mərkəzdə bizi komitənin rəsmisi Valeh Nağıyev qarşılayır. Onun dilindən eşidirik ki, burada bir həftə ərzində 136 nəfər rahatca dincələ bilir: “İstirahət mövsümü iyunun ilk həftələrindən başlayıb, avqustun sonlarına qədər davam edir. 4,5 hektar ərazinin 1,5 hektarı yaşıllıqla əhatə olunub. Hovuzlar yaşa görə bölünüb, burada hər kəs üçün yer var. Uşaqlar üçün qurulan xüsusi meydançalar isə kiçik qonaqların sevimli ünvanına çevrilib. Mərkəzdə 7 kottec, 3 ikimərtəbəli və 1 birmərtəbəli korpus var. Yeməkxana, böyüklər və uşaqlar üçün ayrı-ayrı hovuzlar, uşaq əyləncə mərkəzi, tennis kortu və voleybol meydançası – bunlar hamısı mərkəzin ailəvi istirahət üçün əlverişli olduğunu sübut edir”.

“Qonaqlara fərdi qayğı göstərilir”

“Ülfət” istirahət mərkəzinin tennis kortunda bizi ehtiyatda olan zabit, Vətən müharibəsi iştirakçısı Əşrəf Rəhimov qarşılayır. O, elektron qaydada qeydiyyatdan keçərək göndəriş aldığını deyir. Artıq burada istirahətinin üçüncü gününü tamamlayır. Əşrəf Rəhimov işçilərin diqqətini, rəhbərliyin səmimiyyətini xüsusi vurğulayır və yaradılan şəraitdən razılıqla danışır: “Uşaqlar və böyüklər üçün ayrıca hovuzlar, idman meydançası, müxtəlif əyləncə imkanları var. Hər kəs üçün yaradılan bu imkanlardan böyük məmnuniyyətlə istifadə edirik. Uşaqlar üçün ayrıca oyun meydançası var, biz böyüklər də idmanla məşğul oluruq. Rəhbərlik çox diqqətlidir, qonaqlara fərdi qayğı göstərir”.
Əşrəf Rəhimov hazırda Xaçmaz rayonunda yerləşən akademik Zərifə Əliyeva adına Məktəb-liseydə hərbi müəllim kimi çalışır. Onun üçün bu cür istirahət həm fiziki, həm də mənəvi baxımdan dincəlmək, yeni dərs ilinə daha enerjili başlamaq üçün fürsətdir.

“Xidmətlərin keyfiyyəti daha da artıb, fərq dərhal hiss edilir”

İstirahət edənlər sırasında Milli Arxiv İdarəsinin əməkdaşı İlahə Həsənova da var. O, buradakı şəraitdən xüsusi razılıqla danışır: “Bura doğrudan da çox gözəldir. Hər bir detal düşünülüb, xidmət səviyyəsi yüksəkdir. Biz müraciət etdik, qısa zamanda bizə cavab verildi, gün təyin olundu və gəldik. Artıq neçə ildir ki, mütəmadi olaraq buraya gəlirik. Amma bu il xidmətlərin keyfiyyəti daha da artıb, fərq dərhal hiss edilir”. 

O vurğulayır ki, istirahət təkcə rahatlıq deyil, həm də sağlamlıq, yeni güc toplamaqdır. Bu baxımdan “Ülfət” istirahət mərkəzi onların hər ehtiyacını qarşılayır.

“Günlər keçdikcə məyus oluram ki, artıq qayıtmaq vaxtım yaxınlaşır”

Mərkəzin kiçikyaşlı qonaqlarından biri Qubadlı rayon Xanlıq kənd 1 nömrəli tam orta məktəbin 4-cü sinfini yeni bitirən Aylin Həsənlidir. Üzü gülür, gözlərindən isə istirahətin sevinci oxunur. Soruşuruq ki, burada ən çox nəyi sevir? Qətiyyətlə cavab verir: “Ən sevdiyim məşğuliyyət hovuzda üzməkdir. Günün çox hissəsini burada keçirirəm”.

“Bəs darıxmırsan?” deyə sual veririk. Uşaq səmimiyyəti ilə “Əksinə! Evə getmək istəmirəm. Günlər keçdikcə məyus oluram ki, artıq qayıtmaq vaxtım yaxınlaşır. Buradan getmək istəmirəm”,- deyir.

Onun bu sözləri sübut edir ki, “Ülfət” təkcə böyüklər üçün yox, uşaqlar üçün də yaddqalan, nağıl kimi bir məkandır.
Mediatur iştirakçılarının növbəti dayanacağı Təhsil İşçiləri Azad Həmkarlar İttifaqı Respublika Komitəsinin “Təhsil” istirahət mərkəzi olur. Təbiətin qoynunda yerləşən bu sakit məkan 10 hektardan çox ərazini əhatə edir. Burada istirahət üçün hər cür imkan yaradılıb. 800 yerlik mərkəzin 3 üçmərtəbəli binası, 50-yə yaxın kottec, idman meydançaları, konfrans zalı, hovuzları və 400 nəfərlik yeməkxanası fəaliyyət göstərir.

Jurnalistlər ərazini gəzərək yaradılan imkanlarla yerində tanış olur, təhsil işçilərinin təəssüratlarını dinləyirlər. İstirahət edənlər bildirirlər ki, burada yalnız fiziki olaraq deyil, ruhən də dincəlirsən. Təbiət, sükut, isti münasibət və zəngin infrastruktur mərkəzin üstünlükləri sırasındadır.

“Əvvəllər göndəriş almaq proseduru bir qədər çətin idi”

Mərkəzdə müşahidəmiz davam edərkən məktəb psixoloqu Elnurə Quliyeva ilə həmsöhbət oluruq. O, Gəncə şəhəri 40 nömrəli tam orta məktəbdə artıq 28 ildir ki, məktəb psixoloqu kimi çalışır. Elnurə xanım burada yaradılan şəraitdən məmnunluğunu gizlətmir: “Bura çox gözəl, səfalı məkandır. Əvvəllər göndəriş almaq proseduru bir qədər çətin idi, bu səbəbdən heç vaxt müraciət etməmişdim. İndi isə onlayn formada asanlıqla qeydiyyatdan keçdim. İlk dəfədir ki, bu imkandan yararlanıram. İstərdim ki, bu cür şərait hər il təşkil olunsun. 6 günlük gəlmişik, yeməyin keyfiyyətindən, səliqə-sahmandan, burada çalışanların diqqətindən çox razıyam”.

“Kaş ailəmlə gələrdim…”

İstirahət edənlər arasında Göyçay rayonu 6 nömrəli məktəbin müəllimi Şəlalə İsmayılova da var. O da ilk dəfədir ki, həmkarların tövsiyə  etdiyi bu fürsətdən yararlanır: “24 ildir müəllim işləyirəm, amma bu fürsəti ilk dəfədir ki, dəyərləndirirəm. Burada hər şey yüksək səviyyədədir. Dəniz kənarına getmək üçün avtobuslar təşkil olunub, həyətdəki iki hovuzu isə xüsusilə bəyəndim. İş yoldaşlarımla birlikdə gəlmişəm. Əvvəl bir az tərəddüd edirdim, düşünürdüm ki, bəlkə uyğun olmaz. Amma indi deyirəm ki, kaş ailəmlə gələrdim. Növbəti səfər üçün bunu mütləq planlayacağam”.

Mediaturun növbəti ünvanı Azərbaycanın füsunkar guşələrindən biri Qusar rayonudur. Jurnalistlər AHİK-in üzv təşkilatı olan Səhiyyə İşçiləri Həmkarlar İttifaqı Respublika Komitəsinin “Şəfa” istirahət mərkəzinə baş çəkir, adı kimi şəfa bəxş edən bu mərkəz sağlamlığın, dincəlməyin və yenidən güc toplamağın ünvanıdır. “Şəfa” istirahət mərkəzinin direktoru Zeynəddin Xasmədov jurnalistlərlə söhbətində mərkəzin fəaliyyəti barədə məlumat verir. O bildirir ki, “Şəfa” 2016-cı ildən fəaliyyətə başlayıb və bu illər ərzində səhiyyə işçilərinin sevilən istirahət ünvanına çevrilib: “Üçmərtəbəli yataq korpusu, geniş və işıqlı konfrans zalı, fitnes zalları, uşaq və idman meydançaları, tibb xidməti, müasir kommunikasiya sistemləri və rahat yaşayış otaqları səhiyyə işçiləri və onların ailə üzvlərinin gözəl istirahət etməsi üçün yaradılıb. Burada həm dincəlmək, həm də fiziki sağlamlığı möhkəmləndirmək üçün hər cür şərait var. İki hektarlıq geniş və səliqəli ərazidə yerləşən mərkəz həm yay, həm də qış aylarında fəaliyyət göstərir. Yay mövsümündə burada bir həftəlik istirahət təşkil edilir. Qışda isə daha qısa, iki günlük istirahət proqramı tətbiq olunur”.

Jurnalistlər mərkəzlə tanışlıq zamanı səhiyyə işçiləri və onların ailə üzvlərinin təəssüratlarını da dinləyirlər. Onların sözlərində bir minnətdarlıq duyulur. İllər boyu başqalarının sağlamlığı keşiyində duran insanların da qayğıya, istirahətə ehtiyacı var. “Şəfa” mərkəzi isə bu ehtiyacı tam qarşılayan ünvanlardan biridir.

“Həmkarlarımın təklifi ilə gəldim”

Mərkəzdə istirahət edənlər arasında Xanım Qurbanova da var. O, Nəsimi rayonu 1 saylı uşaq poliklinikasında 42 ildir ki, tibb bacısı kimi çalışır. Bu illər ərzində ilk dəfədir ki, həmkarlarının təklif etdiyi göndəriş imkanından yararlanıb: “Burada istirarət üçün heç müraciət etməmişdim. Bu yayda dedim ki, görüm necə olur. Gəldim, öz gözümlə gördüm ki, münasibət, qulluq çox yüksək səviyyədədir. Hər bir işçi diqqətlidir, rəhbərlik xüsusi qayğı göstərir”.

O qeyd edir ki, təqaüddə olan həyat yoldaşı da buradakı xidmətlərdən faydalanır: “Əsasən duz otağına, ariozol terapiyasına gedirik. Sağlamlığa çox yaxşı təsiri var. Bu cür şərait yaradıldığı üçün minnətdarıq”.

Xanım Qurbanova üçün bu istirahət həm  illərinin mükafatıdır, həm də sağlamlığın qorunması üçün bir fürsətdir.

Burada həm fiziki, həm də mənəvi dincəlirsən

Mediatur iştirakçılarının növbəti səfər marşrutu Quba rayonunda yerləşən daha bir səfalı məkan olan “Nazlı Bulaq” istirahət mərkəzinədir. Adı kimi “nazlı”, gözəl təbiətin qoynunda yerləşən bu mərkəz həm şəraiti, həm də təbii gözəlliyi ilə qonaqları heyran qoyur. Mərkəzdə istirahət edənlərin rahatlığı üçün kotteclər və hotel, həm açıq, həm də qapalı restoranlar fəaliyyət göstərir, uşaqlar üçün əyləncə zonaları yaradılıb.

“Nazlı Bulaq” həm sakitliyi, həm də təbiətin əlvan rəngləri ilə istirahətə gələnlərə rahatlıq bəxş edir. Jurnalistlər burada yaradılan şəraitlə tanış olur, təbii nemətlər içində dincələn təhsil işçilərinin təəssüratlarını dinləyirlər. Mərkəz həm fiziki, həm də mənəvi dincəlmək istəyənlər üçün ideal məkandır.

Bu məkandan da razı və xoş təəssüratlarla ayrılırıq. Yolumuz artıq Bakıyadır. Geri dönərkən bir daha əmin oluruq ki, həmkarlar ittifaqının yaratdığı bu imkanlar təkcə təhsil işçiləri üçün deyil, müxtəlif dövlət qurumlarının əməkdaşlarının da ilboyu yığılan yorğunluğunu çıxarmaq, bir anlıq da olsa, qayğıları arxada qoymaq üçün əvəzsiz fürsətdir.

Texnologiyanın inkişafı isə bu fürsətə qovuşmağı daha da asanlaşdırıb. Artıq istirahət mərkəzlərində dincəlmək üçün müraciət və seçim etmək, göndəriş almaq bir neçə klik qədər sadələşib. Bütün bu imkanlar isə bir daha sübut edir ki, əməkdaşların rifahı üçün görülən işlər təkcə sözlə deyil, əməli addımlarla reallığa çevrilir.